ޢަރަބިއްޔާ ސުކޫލުގެ ޕްރިންސިޕަލް ޝުޖާއު ޢަބްދުލް ރަހީމް މަގާމުން ވަކިކޮށް އެ ސުކޫލު ހިންގުން އިސްކަންދަރު ސުކޫލް ޕްރިންސިޕަލް ހުސައިން ސަޢީދު އާއި ހަވާލުކޮށްފިއެވެ. 

އެޑިއުކޭޝަން މިނިސްޓްރީން ބުނީ، ޢަރަބިއްޔާ ސްކޫލުގެ ކިޔެވުން އިތުރަށް ހަރުދަނާކޮށް ދަރިވަރުންނަށް އެންމެ ފަހި ގޮތަށް ކަންކަން ރާވައި އިންތިޒާމުކުރުމަށް އިދާރީ ގޮތުން ގެނެވުނު ބަދަލެއްގެ ގޮތުން، 7 ނޮވެންބަރު 2022 އިން ފެށިގެން ޢަރަބިއްޔާ ސްކޫލުގެ ހިންގުން ވަނީ އިސްކަންދަރު ސްކޫލުގެ ޕްރިންސިޕަލާ ޙަވާލުކޮށްފައިވާ ކަމަށެވެ. 

އަދި ދަރިވަރުންނަށް ފޯރުކޮށްދެވޭ ތަޢުލީމުގެ ފެންވަރު ރަނގަޅުކޮށް ސަރުކާރު ސްކޫލުތަކުގެ ހިންގުން ހަރުދަނާކުރުމަށް ގެންނަންޖެހޭ ބަދަލުތައް ގެނައުމަކީ އެ މިނިސްޓްރީއިން އަބަދުވެސް ކުރަމުން އަންނަ މަސައްކަތެއް ކަމަށްވެސް ބުނެފައިވެއެވެ. 

މިނިސްޓްރީން މިފަދައިން ބުނި ނަމަވެސް، އަރަބިއްޔާގެ ހައްގުގައި މަސައްކަތް ކުރާ އެ ސުކޫލުގެ އިސް ބެލެނިވެރިން މައުލޫމާތުދޭ ގޮތުގައި ޢަރަބިއްޔާ ސުކޫލުގެ ޕްރިންސިޕަލް މަގާމުން ވަކިކޮށްފައިވަނީ އެ ސުކޫލުގެ ބެލެނިވެރިން ހިންގާ "ސޭވް އަރަބިއްޔާ" ކެންޕެއިން ހުއްޓުވުމަށް މަސައްކަތް ނުކޮށް، އެ ބެލެނިވެރިންނާއި އެކީގައި ޕްރިންސިޕަލް ވެސް ހުރިކަމަށް ބުނެއެވެ. 

ޢަރަބިއްޔާ ސުކޫލުގެ ޕްރިންސިޕަލްގެ މަގާމަށް ޝުޖާއު ޢައްޔަން ކުރެވުނީ 2018 ވަނަ އަހަރުގެ ޖަނަވަރީ މަހުގެ ތެރޭގައެވެ. 

ޝުޖާއުއަކީ ގަތަރު ޔުނިވަސިޓީން ސައެންސް އެންޑް އެޑިޔުކޭޝަންގެ ރޮނގުން ފުރަތަމަ ޑިގްރީ ހާސިލްކުރައްވާފައިވާ ބޭފުޅެކެވެ. އެޑިޔުކޭޝަނަލް އެޑްމިނިސްޓްރޭޝަން އެންޑް މެނޭޖްމަންޓް ދާއިރާ އިން ޝުޖާއު މާސްޓާޒް ހާސިލްކުރެއްވީ މެލޭޝިއާގެ ޔުނިވާސިޓީ ސައިންސް އެންޑް ޓެކްނޮލިޖީންނެވެ. އެއަށްފަހު މެލޭޝިޔާގެ އިންޓަނޭޝަނަލް އިސްލާމިކް ޔުނިވާސިޓީގައި ޕީއެޗްޑީއަށް ކިޔަވާ ވިދާޅުވިއެވެ. 

އަދި ޝުޖާއު ފަދަ ގާބިލް ބޭފުޅަކު މަގާމުން ވަކި ކުރުމުން އަރަބިއްޔާގެ ބެލެނިވެރިން އަންނަނީ ކަންބޮޑުވުން ފާޅުކުރަމުންނެވެ.