ޢަރަބިއްޔާ ސުކޫލުގެ ޕްރިންސިޕަލް ޝުޖާއު ޢަބްދުލް ރަހީމް އެ ސުކޫލުގެ ޕްރިންސިޕަލް ކަމުގެ މަގާމުން ވަކިކޮށް އެ ސުކޫލު ހިންގުން އިސްކަންދަރު ސުކޫލް ޕްރިންސިޕަލް ހުސައިން ސަޢީދާއި ހަވާލު ކުރުމާއި ގުޅިގެން އަރަބިއްޔާގެ ބެލެނިވެރިން އިހްތިޖާޖް ކުރަން ފަށައިފިއެވެ.
މިރޭ ކުރިއަށް ގެންދިޔަ މި ސުލްހަވެރި އިހްތިޖާޖުގައި ޢަރަބިއްޔާގެ ބެލެނިވެރިން ވަނީ އެ ސުކޫލުގެ ޕްރިންސިޕަލް ޝުޖާއު އެނބުރާ އެ ސުކޫލަށް ގެނެސްދިނުމަށް ގޮވާލާފައެވެ. އަދި އެ ބެލެނިވެރިން ވަނީ ޝުޖާއު އާއި އެކުގައި ކަމަށްވެސް ބުނެފައެވެ.
މީގެ އިތުރުން ވެސް، މި އިހްތިޖާޖުގެ ތެރެއިން އަރަބިއްޔާގެ ބެލެނިވެރިން ވަނީ، އެ ސުކޫލާއި ގުޅިގެން ހުރި އެކި ކަންބޮޑުވުންތައް ހިއްސާކޮށްފައެވެ.
އަރަބިއްޔާގެ ޕްރިންސިޕަލް ބަދަލުކުރިކަން އަންގައި އެޑިއުކޭޝަން މިނިސްޓްރީން މިރޭ ބުނީ، ޢަރަބިއްޔާ ސްކޫލުގެ ކިޔެވުން އިތުރަށް ހަރުދަނާކޮށް ދަރިވަރުންނަށް އެންމެ ފަހި ގޮތަށް ކަންކަން ރާވައި އިންތިޒާމުކުރުމަށް އިދާރީ ގޮތުން ގެނެވުނު ބަދަލެއްގެ ގޮތުން، 7 ނޮވެންބަރު 2022 އިން ފެށިގެން ޢަރަބިއްޔާ ސްކޫލުގެ ހިންގުން ވަނީ އިސްކަންދަރު ސްކޫލުގެ ޕްރިންސިޕަލާ ޙަވާލުކޮށްފައިވާ ކަމަށެވެ.
އަދި ދަރިވަރުންނަށް ފޯރުކޮށްދެވޭ ތަޢުލީމުގެ ފެންވަރު ރަނގަޅުކޮށް ސަރުކާރު ސްކޫލުތަކުގެ ހިންގުން ހަރުދަނާކުރުމަށް ގެންނަންޖެހޭ ބަދަލުތައް ގެނައުމަކީ އެ މިނިސްޓްރީއިން އަބަދުވެސް ކުރަމުން އަންނަ މަސައްކަތެއް ކަމަށްވެސް ބުނެފައިވެއެވެ.
މައުލޫމާތު ލިބިފައިވާ ގޮތުގައި އަރަބިއްޔާގެ ޕްރިންސިޕަލް ބަދަލުކޮށްފައިވަނީ ނޭޝަނަލް އިންސްޓިޓިއުޓް އޮފް އެޑިއުކޭޝަން (އެންއައިއީ) ގެ ޕްރިންސިޕަލްގެ މަގާމަށެވެ.
Advertisement
This content is created and paid for by advertisers and does not involve Voice Journalists
