ޢަރަބިއްޔާ ސުކޫލުގެ ޕްރިންސިޕަލް ޝުޖާއު ޢަބްދުލް ރަހީމް އެ ސުކޫލުގެ ޕްރިންސިޕަލް ކަމުގެ މަގާމުން ވަކިކޮށް އެ ސުކޫލު ހިންގުން އިސްކަންދަރު ސުކޫލް ޕްރިންސިޕަލް ހުސައިން ސަޢީދާއި ހަވާލު ކުރުމާއި ގުޅިގެން އަރަބިއްޔާގެ ބެލެނިވެރިން މިއަދުވެސް އިހްތިޖާޖް ކުރަންފަށައިފިއެވެ. 

ވެލާނޭ ބިލްޑިންގ ކައިރީގައި މިއަދު ހެނދުނުން ފެށިގެން ކުރަމުން ދާ މި އިހުތިޖާޖު ގައި އެކި ޝުއޫރުފާޅުކޮށްފައިވާ ލިޔުންތައް ވެސް ހިފައިގެން ތިބެ ގިނަ ބެލެނިވެރިން އަންނަނީ ޕްރިންސިޕަލް ޝުޖާއު އެނބުރި އެ ސުކޫލަށް ގެނައުމަށް ގޮވާލައި އަރަބިއްޔާގެ ހައްގުގައި އަޑު އުފުލަމުންނެވެ. 

މީގެ އިތުރުން ، އަރަބިއްޔާއާއި ގުޅިގެން ހުރި ކަންބޮޑުވުންތައް އެޑިޔުކޭޝަން މިނިސްޓަރ ޑރ. އާއިޝަތު އަލީ އާއި ހިއްސާ ކުރުމަށް އެ ސުކޫލުގެ ބެލެނިވެރިން ވަނީ މިއަދު މިނިސްޓްރީ އަށްވެސް ގޮއްސައެވެ. ބެލެނިވެރިން މިނިސްޓަރ އާއި ބައްދަލު ކުރަން މަސައްކަތް ކުރާތާ ދެ ހަފްތާ ވީއިރުވެސް މިނިސްޓަރު ބުރަ ކަމުން އަދިވެސް ބައްދަލު ކުރެވިފައި ނުވާ ކަމަށް އެ ސުކޫލު ބެލެނެވެރިން ބުނެއެވެ. 

އަރަބިއްޔާގެ ޕްރިންސިޕަލް ބަދަލުކުރިކަން އަންގައި އެޑިއުކޭޝަން މިނިސްޓްރީން ރޭ ބުނީ، ޢަރަބިއްޔާ ސްކޫލުގެ ކިޔެވުން އިތުރަށް ހަރުދަނާކޮށް ދަރިވަރުންނަށް އެންމެ ފަހި ގޮތަށް ކަންކަން ރާވައި އިންތިޒާމުކުރުމަށް އިދާރީ ގޮތުން ގެނެވުނު ބަދަލެއްގެ ގޮތުން، 7 ނޮވެންބަރު 2022 އިން ފެށިގެން ޢަރަބިއްޔާ ސްކޫލުގެ ހިންގުން ވަނީ އިސްކަންދަރު ސްކޫލުގެ ޕްރިންސިޕަލާ ޙަވާލުކޮށްފައިވާ ކަމަށެވެ. އަދި ދަރިވަރުންނަށް ފޯރުކޮށްދެވޭ ތަޢުލީމުގެ ފެންވަރު ރަނގަޅުކޮށް ސަރުކާރު ސްކޫލުތަކުގެ ހިންގުން ހަރުދަނާކުރުމަށް ގެންނަންޖެހޭ ބަދަލުތައް ގެނައުމަކީ އެ މިނިސްޓްރީއިން އަބަދުވެސް ކުރަމުން އަންނަ މަސައްކަތެއް ކަމަށްވެސް ބުނެފައިވެއެވެ. 

މިނިސްޓްރީން މިފަދައިން ބުނި ނަމަވެސް، އަރަބިއްޔާގެ ހައްގުގައި މަސައްކަތް ކުރާ އެ ސުކޫލުގެ އިސް ބެލެނިވެރިން މައުލޫމާތުދޭ ގޮތުގައި ޢަރަބިއްޔާ ސުކޫލުގެ ޕްރިންސިޕަލް މަގާމުން ވަކިކޮށްފައިވަނީ އެ ސުކޫލުގެ ބެލެނިވެރިން ހިންގާ "ސޭވް އަރަބިއްޔާ" ކެންޕެއިން ހުއްޓުވުމަށް މަސައްކަތް ނުކޮށް، އެ ބެލެނިވެރިންނާއި އެކީގައި ޕްރިންސިޕަލް ވެސް ހުރިކަމަށް ބުނެއެވެ. 

މައުލޫމާތު ލިބިފައިވާ ގޮތުގައި އަރަބިއްޔާގެ ޕްރިންސިޕަލް ބަދަލުކޮށްފައިވަނީ ނޭޝަނަލް އިންސްޓިޓިއުޓް އޮފް އެޑިއުކޭޝަން (އެންއައިއީ) ގެ ޕްރިންސިޕަލްގެ މަގާމަށެވެ.