އަންނަ އަހަރު އޮންނަ ރިޔާސީ އިންތިހާބުގައި އެމްޑީޕީން ވާދަ ކުރައްވާނެ ރިޔާސީ ކެންޑިޑޭޓަކު ކަނޑައަޅަން ރިޔާސީ ޕްރައިމަރީ ބާއްވާނެ ދުވަހެއް ކަނޑައަޅާނީ އިދާރީ ގޮތުން ކުރަން ޖެހޭ ކަންކަން ކުރުމަށް ފަހު ކަމަށް އެޕާޓީގެ ސްޕޯކްސްޕާސަން އަނަސް އަބްދުއް ސައްތާރު ވިދާޅުވެއްޖެެއެވެ.
އެމްޑީޕީގެ ރިޔާސީ ކެންޑިޑޭޓް ކަނޑައަޅަން ބާއްވާ ޕްރައިމަރީ ބޭއްވުން ލަސްވަމުންދަތީ ގިނަ ބައެއްގެ ފާޑުކިޔުންތައް އެ ޕާޓީއަށް އަމާޒުވެފައި ވަނިކޮށް، އަނަސް ކުރެއްވި ޓްވީޓެއް ވިދާޅުވީ، 2023 ވަނަ އަހަރު ރިޔާސީ އިންތިހާބުގައި ވާދަކުރާނެ އެމްޑީޕީގެ ކެންޑިޑޭޓް ކަނޑައެޅުމަށްޓަކައި ޕްރައިމަރީ ބާއްވާނެ ދުވަހެއް، އިދާރީ ކަންކަން ފުރިހަމަ ކުރުމަށްފަހު އިއުލާބް ކުރާނެ ކަމަށެވެ.
އެމްޑީޕީގެ ރިޔާސީ ޕްރައިމަރީ ބާއްވާނެ ތާރީޚް އިއުލާން ކޮށްފައި ނުވި ނަމަވެސް، އެ ޕާޓީން ބާއްވާ ރިޔާސީ ޕްރައިމަރީގައި ވާދަ ކުރައްވާނެ ކަމަށް އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދާއި މިހާރުގެ ރައީސުލްޖުމްހޫރިއްޔާ އަދި އެމްޑީޕީގެ އިސްލީޑަރު، ރައީސް އިބްރާހިމް މުހައްމަދު ސޯލިހު ވަނީ ވިދާޅުވެ އެވެ. އެއާއެކު އެ ޕާޓީވެސް މިހާރު ވަނީ ދެ ފެކްޝަނަކަށް ބެހި ވަރަށް ބޮޑަށް ބައިބައި ވެފައެވެ.
އެމްޑީޕީން އަންނަ ރިޔާސީ އިންތިހާބަށް ކެމްޕެއިން ކުރަން ރަސްމީކޮށް އަދި ފަށާފައި ނުވާއިރު، އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓް އަދި ކުރީގެ ރައީސް ޔާމީން އަބްދުލްގައްޔޫމް އަންނަނީ މިހާރު ކެންޕެއިންގެ ދަތުރުތައް ރަށްރަށަށް ކުރައްވަމުންނެވެ. އެގޮތުން ކުރައްވަމުންދާ ދަތުރު ތަކުގެ ތެރެއިން އެ ޕާޓީއަށް މެންބަރުން އިތުރު ކުރުމަށް ވެސް އަންނަނީ މަސައްކަތް ކުރައްވަމުންނެވެ.
Advertisement
This content is created and paid for by advertisers and does not involve Voice Journalists
