ރާއްޖެ ޓްރާންސްޕޯޓު ލިންކް (އާރްޓީއެލް)ގެ މާލޭގައި ދެމުންދާ މިނީ ބަހުގެ ހިދުމަތުގައި ބޭނުން ކުރަން ތެޔޮ އަޅަން ނުޖެހޭ، އިލެކްޓްރިކް ނުވަތަ ކަރަންޓުން ޗާޖުކޮށްގެން ދުއްވާ ބަސްތަކެއް ގެނެސްފި އެވެ.

އެމްޓީސީސީން ބުނީ، މި ބަސްތަކުގެ ސަބަބުން، ޖައްވު ހޫނުކުރާ ވިހަ ގޭސް ރާއްޖެއިން ބޭނުން ކުރުން މަދުކުރުމަށް ރައީސް އިބްރާހިމް މުހައްމަދު ޞާލިހު ކަނޑައަޅުއްވާފައިވާ "ނެޓް-ޒީރޯ ބައި 2030" ސިޔާސަތަށް ވާސިލުވާން އެއްބާރުލުން ދެވުމަކީ ލިބޭ އުފަލެއް ކަމަށެވެ.

އަދި މި ވެހިކަލްތަކުގެ ސަބަބުން ވިހަ ގޭސް ބޭރުވުން މަދުވުމުގެ އިތުރުން ކަސްޓަމަރުންނަށް ދޭ ހިދުމަތް ރަނގަޅުކުރަން ކުރަމުންދާ މަސައްކަތަށްވެސް އެހީވެދޭނެ ކަމަށް ބުނެފައިވެއެވެ. 

އެމްޓީސީސީން، އާރްޓީއެލްގެ ބަސް ފްލީޓަށް އަލަށް އިތުރުކޮށްފައި ވަނީ ކަރަންޓުން ދުއްވާ ހަ ބަހެވެ. ޖުމުލަ 15 މީހުންގެ ޖާގައިގެ މި ބަސްތަކަކީ މިހާރު މާލޭގައި ދުއްވާ މިނީ ބަސްތަކަށް ވުރެ ސައިޒުގެގޮތުން ކުދި ބަސްތަކެކެވެ. އެހެންކަމުން، މި ބަސްތަކަކީ ހިމަ މަގުތަކުގައި ވެސް ދުއްވަން އެކަށީގެންވާ ބަސްތަކެއް ކަމަށް އެމްޓީސީސީން ބުންޏެވެ. އަދި މިއީ ފުރޮޅުލީ ގޮނޑިވެސް އެރުވޭ ގޮތަށް ހަދާފައިވާ ބަސްތަކެއް ކަމަށްވެސް ބުނެފައިވެއެވެ. 

އެމްޓީސީސީން ރާއްޖެ ގެނައި އެ ބަސްތައް ހިދުމަތުގައި ބޭނުންކުރުމަށް ވާންޖެހޭ ތައްޔާރިތައް ވުމަށް ފަހު މާލެ މިނީ ބަހުގެ ހިދުމަތުގައި ބޭނުން ކުރަން ފަށާނެ ކަމަށް އެ ކުންފުނިން ބުންޏެވެ.

މާލޭގެ މިނީ ބަހުގެ ހިދުމަތުގައި މިހާރު 18 ބަސް ހިމެނޭއިރު، އަލަށް އިތުރު ކުރި ބަސްތަކާއެކު ޖުމްލަ 24 ބަސް ދަތުރުކުރާނެ އެވެ.