އަރަބި ތައުލީމު ނައްތާލުމަށް ސަރުކާރުން ކުރާ ކޮންމެ މަސައްކަތެއްގައި ސަރުކާރާއި އެކު ކޯލިޝަން ހަދައިގެން ތިއްބެވި ސިޔާސީ ޕާޓީތަކުގެ ލީޑަރުން ޝާމިލުވާކަމަށް ދީނީ ޢިލްމުވެރިޔާ ޝެއިޚް ސައުދާން ވިދާޅުވެއްޖެއެވެ.
ޝެއިޚް ސައުދާން މިފަދައިން ވިދާޅުވެފައިވަނީ އަރބިއްޔާ ސުކޫލަށް ސަރުކާރުން އިހުމާލުވާކަން ފާހަގަކޮށް ބެލެނިވެރިން އިހުތިޖާޖު ކުރަމުންދާ ދަނޑިވަޅެއްގައި ކުރެއްވި ޓްވީޓެއްގައެވެ.
ޝެއިޚް ސައުދާން ވިދާޅުވީ އަރަނި ތައުލީމު ނައްތާލުމަށް ރައީސް އިބްރާހިމް މުހައްމަދު ސޯލިހުގެ ސަރުކާރުން މަސައްކަތް ކުރަމުންދާކަމަށެވެ. އެ މަސައްކަތުގައި ސަރުކާރު ކޯލިޝަންގައި ހިމެނޭ ހުރިހާ ލީޑަރުންވެސް ޝާމިލުވާކަމަށެވެ.
އަރަބިއްޔާ ސުކޫލާއި އެހެން ސުކޫލުތަކާއި ތަފާތުކުރުންތައް ގެންގުޅޭކަން ފާހަގަކޮށް އަރަބިއްޔާގެ ބެލެނިވެރިން ގެންދަނީ ނުރުހުން ފާޅުކުރަމުންނެވެ.
އެގޮތުން އަރަބިއްޔާގެ ދާއިމީ ސުކޫލު އެޅުމަށް ބާ ޖަމާލުއްދީން ހަމަޖައްސާދެއްވާފައި ވަނިކޮށް އެޑިއުކޭޝަން މިނިސްޓްރީއިން ޕްލިސީއަށް ގެނައި ބަދަލަކުން ބާ ޖަމާލުއްދީނުން ބޮޑު ބައެއް އެ ސުކޫލަށް ގެއްލިފައިވާކަން ބެލެނިވެރިން ދަނީ ފާހަގަކުރަމުންނެވެ. އަދި އެކަން އެގޮތަށް ކުރުމުގެ ސަބަބުން އަރަބިއްޔާއަށް ކައިރި މުސްތަގުބަލެއްގައި އަނެއްކާވެސް ޖާގައިގެ ދަތިކަން ދިމާވާނެތީ، އެއަށްވުރެ ފަހި ގޮތްތަކެއް އެ ސުކޫލަށް ހޯދައިދިނުމަށް ބެލެނިވެރިން ވަނީ އަޑުއުފުލާފައެވެ.
މި މައްސަލަ ހޫނުވެފައި ވީނަމަވެސް ސަރުކާރުގެ ފަރާތުން އެދެވޭ އެއްބާރުލުމެއް ނުދޭއިރު، މި ކަންކަން ކުރަމުންދަނީ ސަރުކާރުގެ ވަޒީރުންނާއި ރައީސުލްޖުމްހޫރިއްޔާ އަދި ސަރުކާރުގެ ހިއްސާދާރުންވެސް ޝާމިލުވެގެންކަމަށް ޝެއިޚް ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
