އައްޑޫ ސިޓީއަށް ވަޑައިގަތުމުން ރައްޔިތުން ކީ ހޫނު މަރުހަބާއާއި ދެއްކެވި ތާއީދު 2023 ވަނަ އަހަރުގެ ރިޔާސީ އިންތިޚާބުގެ ވޯޓަށް ބަދަލުކޮށްދެއްވުމަށް ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު އެދިވަޑައިގެންފިއެވެ.
ރައީސް ޔާމީން އައްޑޫ ސިޓީއަށް ކުރެއްވި ދަތުރުފުޅުގައި މިއަދު ވަނީ އެ ސިޓީގެ ހުޅުދޫ-މީދޫއަށް ވަޑައިގެން ޚާއްސަ ޖަލްސާއެއްގައި ބައިވެރިވެވަޑައިގެންފައެވެ.
އެމަނިކުފާނު އައްޑޫ ސިޓީއަށް ކުރެއްވި މި ދަތުރުފުޅުގައި ރަށްރަށުން ހޫނު މަރުހަބާއެއް ދަންނަވާފައިވާއިރު މިއީ ރާއްޖޭގެ ސިޔާސީ މަޝްރަހަށް އަންނަމުންދާ ބޮޑު ބަދަލެއްގެ ގޮތުގައި ރައީސް ޔާމީންވެސް ފާހަގަކުރެއްވިއެވެ.
އެއާއެކު ރައްޔިތުންނާއި މުޚާބަތުކުރައްވާ ރައީސް ޔާމިން ވިދާޅުވީ ރައްޔިތުން އެމަނިކުފާނަށް ކީ މަރުހަބާއާއި ދެއްކެވި ދާއީދު ކުރިއަށް އޮތް އިންތިޚާބުގެ ވޯޓަށް ބަދަލުކޮށްދެއްވުމަށް އެދިވަޑައިގަންނަވާކަމަށެވެ.
"ތިބޭފުޅުން ތި ދެއްކެވި ތާއީދު ވޯޓަށް ބަދަލުކޮށްދެއްވާ. ތި ދެއްކެވި ތާއީދު އިންޑިއާ ސަރުކާރަށް މިހާރު މި އޮތް ސަރުކާރަށް ދައްކަވާ މިއީ ތިމަންނަމެންގެ ނަފްރަތޭ، ތިމަންނަމެންގެ ހިތްހަމަ ނުޖެހުމޭ. އިންޑިއާ ސިފައިން ބައިތިއްބައިގެން ކުރާ ކަންކަމަށް ބޮޑުކޮށް ނޫނެކޭ ބުނަމޭ، އެ ދައްކަވާ ދެއްވާ"
ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން
ރައީސް ޔާމީން ވިދާޅުވީ އަންނަ އަހަރުގެ ރިޔާސީ އިންތިޚާބަކީ ދިވެހިރާއްޖޭގެ މިނިވަންކަން ނެތުމާއި އޮތުމުގެ މައްޗަށް ބިނާވާ އިންތިޚާބެއްކަމަށެވެ.
މި އިންތިޚާބުގައި ދިވެހި ވަންތަ ސިފަތަކެއް ބިނާކުރާނެ، ދިވެހިންގެ ވެރިކަމެއް ގާއިމުކުރުމަށް ޕީޕީއެމްއަށް ވޯޓުދެއްވުން މުހިންމުކަމަށާއި، ޕީޕީއެމްއާއި އަަލަށް ގުޅިވަޑައިގަންނަވާ ފަރާތްތައް އެ އަޒުމުގައި މަސައްކަތްކޮށްދެއްވުމަށް އިލްތިމާސްކުރައްވާކަމަށް ރައީސް ޔާމީން ވިދާޅުވިއެވެ.
އަދި 2023 ޕީޕިއެމްއަށް ކާމިޔާބުކޮށްދިނުމަށް އައްޑޫ ސިޓީއިން ނަމޫނާ މަސައްކަތްތަކެއް ކުރައްވާނެކަމަށް އުންމީދުކުރައްވާކަމަށްވެސް ރައީސް ޔާމީން ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
