2023 ވަނަ އަހަރުގެ ރިޔާސީ އިންތިޚާބު ކާމިޔާބުވެއްޖެނަމަ އައްޑޫ ސިޓީ ހިތަދޫއާއި ހުޅުދޫ-މީދޫ ބްރިޖަކުން ގުޅުވާލަދެއްވާނެކަމަށް ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު ވިދާޅުވެއްޖެއެވެ. 

އައްޑޫ ސިޓީއަށް ރައީސް ޔާމީން ކުރައްވާ ދަތުރުފުޅުގައި އެމަނިކުފާނު ވަނީ މިއަދު ހުޅުދޫ-މީދޫއަށް ވަޑައިގެންފައެވެ. އެ ރަށުން އެމަނިކުފާނަށް ހޫނު މަރުހަބާއެއް ދަންނަވާފައިވާއިރު، ރައީސް ޔާމީން ބައިވެރިވެވަޑައިގެން ވަރަށް ޚާއްސަ ޖަލްސާއެއްވެސް އެ ރަށުގައި ވަނީ ކުރިއަށް ގެންގޮސްފައެވެ. 

އެ ޖަލްސާގައި ވާހަކަދައްކަވަމުން ރައީސް ޔާމީން ވަނީ އައްޑޫ ސިޓީއަށް އެމަނިކުފާނު ގެންގުޅުއްވާ ތަސައްވަރު ރައްޔިތުންނާއި ހިއްސާކުރައްވާފައެވެ. އެގޮތުން ހުޅުދޫ-މީދޫގެ ރައްޔިތުން ބޭނުންވާ ކަންތައްތައް ރައްޔިތުން ހިއްސާކުރައްވަމުން ގެންދަވާކަމަށާއި، އެގޮތުން ހުޅުދޫ-މީދޫ ހިތަދޫއާއި ގުޅިގެން ދިއުމަކީ ރައްޔިތުންގެ ހުވަފެނެއްކަން އެމަނިކުފާނަށް ވިސްނިވަޑައިގަންނަވާކަމަށް ރައީސް ޔާމިން ވިދާޅުވިއެވެ. 

Advertisement

އެމަނިކުފާނު ބައިވެރިވެވައިގެން ކުރިއަށް ގެންދެވި ޖަލްސާގެ ވޯޑިއަމް ތައްޔާރުކޮށްފައިވަނީވެސް ހުޅުދޫ-މީދޫ ހިތަދޫއާއި ގުޅާލާ ބްރިޖެއް ފަރުމާކޮށްގެންނެވެ. 

އެކަން ފާހަގަކުރައްވާ ރައީސް ޔާމީން ވިދާޅުވީ އެކަމަކީ ރައްޔިތުން އެންމެ އެދޭ ގޮތްކަމަށްވާނަމަ ޕީޕީއެމްގެ ވެރިކަމެއްގައި ރައްޔިތުންގެ އެ ވައުދު ފުއްދަވާދެއްވާނެކަމަށް ވިދާޅުވެފައެވެ. 

އެއާއެކު ރައީސް ޔާމީން ވަނީ ލޯކަލް ގަވަމަންޓުގެ ދަށުގައި އޮތް ނަމަވެސް ރަށްރައް ތަރައްގީކުރުމަށް އޮތް ހުރަސްތައް ނައްތާލަން ޖެހޭކަމަށެވެ.

މި ސަރުކާރަށް ވާގިވެރިވެ އިންތިޚާބީ ހުރިހާ ގޮނޑިތަކެއްކަހަލަ ގޮތަކަށް އައްޑޫ ސިޓީއިން އެމްޑީޕީއަށް ދީފައިވާއިރު، ރައްޔިތުން ބޭނުންވާ ތަރައްގީ އައްޑޫއިން ނުފެންނައިރު، އެ މެމްބަރުންނާއި ރައްޔިތުން ސުވާލުކޮށް ރައްޔިތުންގެ ނުރުހުން ދައްކަން ޖެހޭކަމަށް ރައީސް ޔާމީން ވަނީ ވިދާޅުވެފައެވެ.