މަރިޔަމް ނިޝާއަށްފަހު، އެމްޑީޕީގެ ކުރީގެ ޗެއަރ ޕަރސަން އަދި ރައްޔިތުންގެ މަޖިލީހުގެ ކުރީގެ ނައިބު ރައީސް ރީކޯ މޫސާ މަނިކު އަލުން އެމްޑީޕީއާ ގުޅިވަޑައިގެންފިއެވެ.

މަރިޔަމް ނިޝާ އާއި ރީކޯ މޫސާ މަނިކަކީ ފިލްމީ ދާއިރާގައި އެކީގައި ގިނަ މަސައްކަތް ތަކެއް ކުރި ދެމީހުންނެވެ. އެ ދެމީހުންގެ ތެރެއިން ސިޔާސީ ދާއިރާއަށް ފުރަތަަމަ ނުކުތީ ރީކޯ މޫސައެވެ. އެގޮތުން އޭނާ، މިހާރުގެ ވެރިކަން ކުރާ މައި ޕާޓީއާއި ގުޅި، ރައްޔިތުންގެ މަޖިލީހުގައި އެ ޕަޓީގެ މެންބަރެއްގެ ހައިސިއްޔަތުން ވެސް ގިނަ ދުވަސް ވަންދެން މަސައްކަތް ކޮށްފައިވެއެވެ. އޭނާ އެމްޑީޕީން ވަކިކުރީ ރައީސް ނަޝީދުގެ ލީޑަރޝިޕްގައި 2016 ވަނަ އަހަރުއެވެ.

އެއަށްފަހު އަލުން އެމްޑީޕީއަށް ސޮއިކޮށް، ފޯމް ޙަވާލުކޮށްފައިވަނީ މުލިއާގޭގައި މިއަދު ބޭއްވި ބައްދަލުވުމެއްގައެވެ. މި ބައްދަލުވުމުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙާއި އެމްޑީޕީގެ ޗެއަރޕަރސަން އަދި އިކޮނޮމިކް މިނިސްޓަރ ފައްޔާޒް އިސްމާޢިލްއާއި ހާރިޖީ މިނިސްޓަރ ޝާހިދުއާއި ޑިފެންސް މިނިސްޓަރ މާރިޔާ އަޙްމަދު ދީދީއާއި އެމްޑީޕީގެ ޕަލިމަންޓްރީ ގްރޫޕްގެ ލީޑަރ މުޙައްމަދު އަސްލަމް ބައިވެރިވެވަޑައިގެންނެވިއެވެ.

Advertisement

ރީކޯ މޫސާ އެމްޑީޕީއާއި ގުޅިފައިމިވަނީ، މަރިޔަމް ނިޝާވެސް ކުއްލި ގޮތަކަށް އެމްޑީޕީއާއި ގުޅިފައިވާ ދަނޑިވަޅެއްގައެވެ. އެގޮތުން، ސެޕްޓެމްބަރު ފަހު 18 ވަނަ ދުވަހު ޖުމްހޫރީ ޕާޓީއާއި ގުޅުނުކަން މަރިޔަމް ނިޝާ އިއުލާން ކުރުމަށްފަހު، ވަކި ސަބަބެއްވެސް ހާމަ ނުކޮށް، އިއްޔެ ވަނީ އެމްޑީޕީ އާއި ގުޅިފައެވެ.