އިއާދަކުރަނިވި ހަކަތަ އުފެއްދުމާއި ގުޅޭގޮތުން ސްޓެލްކޯއާއި ފިންލެންޑްގެ ޓެކްނޮލޮޖީ ގްރޫޕް ވަރޓްސިލާ ކުންފުންޏާއި ދެމެދު ގިނަ މަޝްވަރާތަކެއް ކޮށްފިއެވެ.
ސްޓެލްކޯއިން ބުނީ، މިއީ ރައީސުލްޖުމްހުރިއްޔާ އިބްރާހީމް މުހައްމަދު ޞާލިހު ގެ ސަރުކާރުގެ 2030 "ނެޓްޒީރޯ" އަމާޒަށް ވާސިލުވުމަށް، ސްޓެލްކޯ އިން ކުރަމުންދާ މަސައްކަތްތަކުގެ ތެރެއިން ކުރިއަށްދިޔަ މަޝްވަރާތަކެއް ކަމަށެވެ.
އެގޮތުން ރޭގައި އޮތް ބައްދަލުކުރެއްވުމެއްގެ ތެރެއިން ތިމާވެއްޓާ ރައްޓެހި އިއާދަކުރަނިވި ހަކަތަ އުފެއްދުމާއި ގުޅޭގޮތުން ވަރޓްސިލާ ކުންފުންޏާއި ދެމެދު މޝްވަރާކުރެވުނު ކަމަށާ، އަދި އެ މަޝްވަރާތަކުގެ އަލީގައި ހެދިފައިވާ ދިރާސާތަކާއި މެދު ވާހަކަދެކެވިފައިވާ ކަމަށްވެސް ސްޓެލްކޯއިން ބުންޏެވެ.
މީގެ އިތުރުން، ވަރޓްސިލާ ކުންފުނިން ސްޓެލްކޯއާއި އެކުގައި މަސައްކަތް ކުރާތާ 30 އަހަރުފުރުމާއި ގުޅިގެން، އެކަމުގެ އަގުވަޒަންކޮށް އެކުންފުނިން ސްޓެލްކޯގެ މެނޭޖިންގ ޑިރެކްޓަރ އަޙުމަދު ޝަރީފަށް ހަނދާނީ ފިލައެއް އަރުވާފައިވާ ކަމަށްވެސް އެ ކުންފުނިން ވަނީ ފާހަގަކޮށްފައެވެ.
އިއާދަ ކުރުވަނިވި ހަކަތަ އުފެއްދުމަށް ސްޓެލްކޯ އިން މިހާރުވެސް އަންނަނީ ގިނަ މަސައްކަތް ތަކެއް ކުރަމުންނެވެ. އެގޮތުން، ރަށްރަށުގައި ހުންނަ ސްޓެލްކޯގެ އޮފީސްތަކާއި އިންޖީނުގެ ތަކުގެ ފާރުގައި ސޯލާ ޕެނެލް ހަރުކޮށް އަވިން ހަކަތަ އުފެއްދުމުގެ މަޝްރޫއު ތައް އެ ކުންފުނިން އަންނަނީ ކުރިއަށް ގެންދަމުންނެވެ.
Advertisement
This content is created and paid for by advertisers and does not involve Voice Journalists
