ޗާގޯސް މައްސަލަ އާއި ގުޅިގެން ރޭ ފޮރިން މިނިސްޓަރ ޝާހިދާއި ބަންޑާރަ ނާއިބު އިބްރާހިމް ރިފްއަތު ބޭއްވި ނޫސްވެރިންގެ ބައްދަލުވުމުގައި ދެއްކެވި ގިނަ ވާހަކަތަކަކީ ދޮގުގެ ގޮތުގައި ހާމަވަމުންދާ ކަމަށް ވިދާޅުވެ އުނގޫފާރު ދާއިރާގެ މެމްބަރު މުހައްމަދު ވަހީދު ގިނަ ސުވާލުތަކެއް އުފައްދަވައިފިއެވެ.

ރޭ ރައީސް އޮފީހުގައި ކުރިއަށްދިޔަ ނޫސްވެރިން ބައްދަލުވުމެއްގައި ވާހަކަ ދައްކަވަމުން ޗާގޮސް އަދި ރާއްޖެ ދެމެދު އޮންނަ ކަނޑުގެ ސަރަހައްދު ރާއްޖޭގެ މަސްވެރިން ބޭނުންކޮށްފައިވާކަމުގެ ހެއްކެއް ނެތްކަމަށް ރިފްއަތު ވިދާޅުވުމާއި ގުޅިގެން އެކަމަށް ރައްދު ދެއްވައި ވަހީދު ކުރެއްވި ޓުވީޓެއްގައި ވަނީ، ފުށުއަރާ ކަނޑު ދިވެހީން ބޭނުންކުރި ކަމުގެ ހެކި ނެތްކަމަށް ނިންމައި ދޫކޮށްލެއްވީ ކިހިނެއް ކޮންއިރަކުތޯ ސުވާލު ކުރައްވާފައެވެ. އަދި ރިފްއަތު އެފަދައިން އެ ނިންމެވި އެކަނޑު މޮރިޝަސް މީހުން ބޭނުންކުރި ކަމަށް އޮތީ ކޮން ހެއްކެއްތޯވެސް ބަލާނުލައިތޯވެސް ވަހީދު ވަނީ ސުވާލުކުރައްވާފައެވެ. 

"ފުށުއަރާ ކަނޑު ދިވެހީން ބޭނުންކުރި ކަމުގެ ހެކި ނެތްކަމަށް ނިންމައި ދޫކޮށްލެއްވީ ކިހިނެއް ކޮންއިރަކު؟ ދިވެހީން ކައިރީ އަހާވެސް ނުލައި؟ އަދި އެކަނޑު މޮރިޝަސް މީހުން ބޭނުންކުރި ކަމަށް އޮތީ ކޮން ހެއްކެއްތޯވެސް ބަލާނުލައި؟" ވަހީދު ސުވާލު އުފައްދަވާފައިވެއެވެ. 

މީގެ އިތުރުން ވަހީދު ވިދާޅުވީ ޕްރެސް ކޮންފަރެންސުން ވަރަށް ގިނަ ބައިވަރު ވާހަކަތަކެއް ދޮގުގެ ގޮތުގައި ހާމަވަމުންދާ ކަމަށެވެ. އެގޮތުން ރޭގެ ޕްރެސްގައި ޗާގޯސް މައްސަލާގައި ސިޓީއެއް މަޖިލީހަށް ފޮނުއްވި ކަމަށް ބަންޑާރަ ނާއިބު ވިދާޅުވިއިރު އެ ސިޓީ ފެނިފައިނުވާކަމަށްވެސް ވަހީދު ވިދާޅުވި އެވެ. އަދި މަޖިލީހުގެ ރުހުމާއި ނުލައި ރާއްޖޭގެ ސަރަހައްދަށް ބަދަލުތަކެއް ގެންނަމުންދާކަން ކަށަވަރުކަމަށްވެސް އެނާ ވިދާޅުވިއެވެ.

"ތިޔަ ސިޓީއެއް ގައިމުވެސް އަޅުގަނޑެއް ނުދެކެން. އެކަމު ކަށަވަރު ކަމަކީ ސަރަހައްދަށް ބަދަލު އަތުވެދާނެވަރު ކަމެއް އެ ނިމެންދަނީ ރައްޔިތުންގެ މަޖިލީހުގެ ރުހުމާނުލާކަން." ވަހީދު ވިދާޅުވިއެވެ.