މިސްރުގައި ކުރިއަށް ދިޔަ ކޮޕް27 ސަމިޓަށް ފަހު ރައްޔިތުންގެ މަޖިލީހުގެ ރައީސް މުހައްމަދު ނަޝީދު ރަސްމީ ދަތުރުފުޅެއްގައި މިއަދު އިޓަލީއަށް ވަޑައިގަންނަވާނެ ކަމަށް މަޖިލީހުގެ އިދާރާއިން ބުނެފިއެވެ.
މަޖިލީސް އިދާރާއިން މިއަދު ބުނީ ނަޝީދުގެ މި ދަތުރުފުޅަކީ ހެބިޓަބަލް ޕްރޮޖެކްޓްސްގެ އެނުއަލް ކޮންފަރެންސްގައި ބައިވެރިވެވަޑައިގަތުމަށް އިޓަލީގެ ރޯމަށް ކުރައްވާ ދަތުރުފުޅެއް ކަމަށެވެ. އަދި އެމަނިކުފާނު މިއަދު ރޯމަށް ފުރާވަޑައިގަންނަވާނީ ކޮޕް 27 ގައި ބައިވެރިވެވަޑައިގަތުމަށް މިސްރަށް ކުރެއްްވި ދަތުރުފުޅަށްފަހު މިސްރުން ކަމަށްވެސް ބުނެފައިވެއެވެ.
ހެބިޓަބަލް ޕްރޮޖެކްޓްގެ މަގުސަދަކީ މޫސުމަށް އަންނަ ނޭދެވޭ ބަދަލުތަކުގެ އަސަރުތަކާއި، ހިޖުރަކުރުމާއި، ޑިސްޕްލޭސްމެންޓް ޕެޓާންސްއާ ދެމެދު އޮންނަ ގުޅުންތައް ދެނެގަތުމާއި، ކުރިއަށް އޮތް ތަނުގައި އަންނާނެ ބަދަލުތައް ލަފާކުރުމެވެ. 2020 ވަނަ އަހަރުން ފެށިގެން 2024 ވަނަ އަހަރަށް ކުރިއަށްދާ މި ޕްރޮޖެކްޓަގައި 17 ގައުމަކުން 21 ޕާޓްނަރުން ބައިވެރިވެ އެވެ. އެ ކޮންފަރެންސްގައި ބައިވެރިން އެއްވެ ޕްރޮޖެކްޓް ހިންގުމާބެހޭ ގޮތުން މަޝްވަރާކޮށް ނަތީޖާތައް ހުށަހަޅާނެއެވެ.
ނަޝީދަކީ ހެބިޓަބަލް ޕްރޮޖެކްޓްގެ އެޑްވައިޒަރީ ބޯޑުގެ މެންބަރެކެވެ. ނަޝީދުގެ ދަތުރުފުޅުގެ ޚަރަދުބަރަދު ބަލަހައްޓާނޯ ހެބިޓަބަލް ޕްރޮޖެކްޓްގެ ކޯޑިނޭޓަރެއްގެ ހައިސިއްޔަތުން ޔުނިވަރސިޓީ އޮފް ލީޖްގެ ފަރާތުންނެވެ.
Advertisement
This content is created and paid for by advertisers and does not involve Voice Journalists
