ރައްޔިތުންގެ މަޖިލީހުގެ ރައީސް އަދި މައްޗަންގޯޅި މެދު ދާއިރާގެ މެންބަރު، މުހައްމަދު ނަޝީދު، މަޖިލީހުގެ މެންބަރުކަމުން ވަކިކުރުމަށް އެދި ސުޕްރީމް ކޯޓަށް ދުސްތޫރީ މައްސަލައެއް ހުށަހަޅައިފި އެވެ.
މިސްރުގައި މިހާރު ކުރިއަށްދާ ކޮޕް-27 ސަމިޓްގައި ސްރީލަންކާ ތަމްސީލްކުރާ ވަފުދުގައި ނަޝީދު ބައިވެރިވެވަޑައިގަތުމާއި ގުޅިގެން ސްޕްރީމްކޯޓަށް މި މައްސަލަ ހުށަހެޅީ ގާނޫނީ ވަކީލު އަހުމަދު ތޯލިބެވެ.
ވަކީލު އަހުމަދު ތޯލިބު ހުށަހެޅި ދުސްތޫރީ މައްސަލާގައި ބުނީ، ނަޝީދުގެ އެ އަމަލަކީ ގާނޫނު އަސާސީގައި ބަޔާންކޮށްފައިވާ މަޖިލީހުގެ މެންބަރެއްގެ ޒިންމާތަކާއި ޝަރުތުތަކާ ހިލާފު އަމަލެއް ކަމުގަ އެވެ. އެގޮތުން, އެއީ ގާނޫނު އަސާސީގެ 75 ވަނަ މާއްދާއާ ހިލާފު ކަމެއް ކަމަށްވެސް ފާހަގަކޮށްފައިވެ އެވެ.
ގާނޫނުއަސާސީގެ އެ މާއްދާގައި ބުނަނީ މަޖިލީހުގެ މެންބަރުން އަމަލުކުރަންޖެހޭނީ ދިވެހި ދައުލަތާއި ރައްޔިތުންގެ މަސްލަހަތާއި ހެވާ ލާބަޔަށް ބަލައިގެން ކަމަށެވެ.
އަދި މަޖިލިސް މެންބަރަކަށްވެ ހުރެ ގާނޫނުއަސާސީގެ ޖަދުވަލު އެކެއްގެ ހަތަރުވަނަ ނަންބަރުގައިވާ މަޖިލިސް މެންބަރުންގެ މަގާމާއި ހަވާލުވާއިރު ގާނޫނުއަސާސީން ލާޒިމުކުރާ ހުވަޔާ ވެސް ރައީސް ނަޝީދު ހިލާވެފައިވާ ކަމަށް އެ މައްސަލާގައި ބުނެފައިވެއެވެ.
މީގެ އިތުރުން، މަޖިލީހުގެ މެންބަރުން އަމަލު ކުރަން ޖެހޭނީ ގައުމީ މަސްލަހަތާއި ރައްޔިތުންގެ މަންފާއަށް އިސްކަންދީގެން ކަމަށްވާއިރު، އެއްވެސް މެންބަރަކު އެ މީހެއްގެ ނުވަތަ އެ މީހަކާ ހާއްސަ ގުޅުމެއް އޮތް އެހެން މީހެއްގެ ވެސް ޒާތީ މަސްލަހަތެއް ކުރިއެރުވުމަށް މަގާމުގެ ބޭނުންކޮށްގެން ނުވާނެ ކަމަށް އެ މައްސަލާގައި ފާހަގަކޮށްފައިވެއެވެ.
އެހެންވެ، ގާނޫނުއަސާސީއާއި މެންބަރުކަމުގެ ހުވަޔާ ހިލާފުވީ ދުވަހުން ފެށިގެން ރައީސް ނަޝީދުގެ ކިބައިން މަޖިލީހުގެ މެންބަރުކަމުގެ ޝަރުތުތައް އުނިވެފައިވާ ކަމަށް ބަލައި ދިނުމަށް ދައުވާގައި ވަނީ އެދިފަ އެވެ.
އަދި "އޭނާގެ ކިބައިން ގާނޫނުއަސާސީގައި ބުނާ ގާނޫނީ ޝަރުއީ މަގާމާއި ހައިސިއްޔަތު ބާތިލުވެފައިވާ ކަމަށްބަލައި ނަޝީދު މަޖިލީހުގެ މެންބަރުކަމުން ވަކިވެފައިވާ ކަމަށް ކަނޑައަޅައިދިނުމަށް،" ވެސް ދައުވާގައި އެދިފައިވެ އެވެ.
މި މައްސަލަ ސުޕްރީމް ކޯޓަށް ބަލައިގަތުމާ ގުޅޭ ގޮތުން އަދި ވަކި ގޮތެއް ނުނިންމަ އެވެ.
Advertisement
This content is created and paid for by advertisers and does not involve Voice Journalists
