އިސްކަންދަރުމަގުގައި ހުންނަ މ. ނިރުފެހީގެ ތިރީ ގަރާޖުގައި އަލިފާން ރޯވެ ހިނގި އަލިފާނުގެ ހާދިސާގައި ގެއްލުންވި މީހުންނަށް އެންޑީއެމްއޭ އިން އެހީތެރިކަން ފޯރުކޮށްދެމުންދާ ކަމަށް އެ އޮތޯރިޓީން ބުނެފިއެވެ. 

މ. ނިރުފެހީގެ ތިރީ ގަރާޖުގައި ރޭ 12:30 އެހާކަންހާއިރު ރޯވި އަލިފާންގަނޑު އެއްކޮށް ނިއްވާލެވުނީ ފަތިހު 4:34 ގައިކަމަށް އެމްއެންޑީއެފްއިން މައުލޫމާތު ދީފައިވެއެވެ.

އެމްއެންޑީއެފްއިން އެންމެ ފަހުން މައުލޫމާތު ދިންގޮތުގައި މި ހާދިސާގައި ޖުމްލަ 10 މީހުން ނިޔާވެފައިވާއިރު, އެކަކަށް އައިޖިއެމް ހޮސްޕިޓަލުން ފަރުވާދެމުންދާކަމަށެވެ. އަދި އޭނާގެ ހާލުވެސް ކްރިޓިކަލް ކަމަށް މައުލޫމާތު ދެއެވެ.

ރޭ ހިނގި މި އަލިފާނުގެ ހާދިސާގައި 14 މީހުން ސަލާމަތްކޮށްފައިވާަ ކަމަށްވެސް ފުލުހުން މައުލޫމާތު ދީފައިވާއިރު، އެމީހުން ވަގުތީ ގޮތުން މާފަންނު ސްޓޭޑިއަމް އަށް ގެންދެވިފައިވާ ކަމަށް އެންޑީއެމްއޭ އިން ބުނެއެވެ. އަދި އެމީހުންނަށް ދޭންޖެހޭ އެކި އެހީތެރިކަން މިވަގުތުއެ އޮތޯރިޓީން ފޯރުކޮށްދެމުންދާ ކަމަށް ވެސް ބުނެފައިވެއެވެ. 

އެގޮތުން އަލިފާނުގެ ހާދިސާގައި އެ އޮތޯރިޓީގެ ބެލުމުގެ ދަށަށް 18 ބިދޭސީއަކާއި 13 ދިވެއްސަކު ގެނެސްފައިވާކަމަށާ މީގެތެރެއިން ގިނަ ދިވެހިން އެމީހުންގެ އާއިލީ މީހުން ކައިރިޔަށް މިހާރު ބަދަލުވެފައިވާ އެންޑީއެމުން ބުނެއެވެ. އަދި ބާކީ ތިބި މީހުން ގެސްޓު ހައުސްތަކަށް ބަދަލުކުރުމުގެ މަސައްކަތް ފަށާފައިވާކަމަށްވެސް އެންޑީއެމްއޭއިން ބުނެއެވެ.

މިހާދިސާގައި ނިޔާވެފައިވަނީ ބިދޭސީން ކަމަށްވާއިރު އޭގެ ތެރޭގައި ގިނައީ އިންޑިއާ ރައްޔިތުންނެވެ.