ރޭ ދަންވަރު މ. ނިރުފެހިގައި އަލިފާން ރޯވެ ހިނގި އަލިފާނުގެ ހާދިސާ ހިނގި ގޮތާއި ސަބަބު އަދިވެސް ހޯދިފައިނުވާކަމަށާއި، އެކަން ބަލަމުންދާކަމަށް ފުލުހުން ބުނެފިއެވެ.
ރޭ ހިނގި ހާދިސާ އާއި ގުޅިގެން ފުލުހުންގެ އެސިސްޓަންޓް ކޮމިޝަނަރ އޮފް ޕޮލިސް އަލީ ޝުޖާއު މީޑިއާތަކަށް މައުލޫމާތު ދެއްވަމުން ވިދާޅުވީ އަލިފާނުގެ ހާދިސާ ހިނގި ތަނަކީ ކޮން ބަޔަކު ކުއްޔަށް ދީގެން އުޅޭ ތަނެއްކަން ހޯދިފައިނުވާއިރު މިހާތަނަށް އައިއިރު މި ހާދިސާ ހިނގަން މެދުވެރިވި ވަކި ސަބަބެއްވެސް ދެނެގަނެވިފައިނުވާކަމަށެވެ.
މީގެ އިތުރުން އާއްމުކޮށް މިފަދަ ކޮންމެ ހާދިސާ އަކާއި ގުޅިގެންވެސް ސްކޭމް ކޯލްތައް އަންނައިރު މި ހާދިސާ އާއި ގުޅިގެންވެސް އެފަދަ ކޯލްތައް އައިސްފާނެތީ އެކަމަށް ސަމާލުވުމަށް ފުލުހުން ވަނީ އިލްތިމާސްކޮށްފައެވެ. އެގޮތުން މިހާދިސާގައި ގިނަ ބަޔަކު މަރުވެފައިވާއިރު އެމީހުން މަރުވި ގޮތާއި އަލިފާން ރޯވި ގޮތް ކަމަށް ބުނެ ފޮޓޯ ވީޑިއޯ ފެންނަ ލިންކުތައް އާންމުންނަށް ފޮނުވައިގެން އޮޅުވާލައިގެން ފައިސާ ހޯދަފާނެކަމަށްވެސް ފުލުހުން ވިދާޅުވެއެވެ.
އަދި ހަމައެހެންމެ، މި ހާދިސާގައި ގިނަ އާއިލާތަކަކަށް އެހީތެރިކަން ބޭނުންވެފައިވާއިރު އެހީއަށް އެދި ކަމަށް ބުނެ ފޯނުތައް ކުރުމަކީވެސް އެކަށީގެންވާ ކަމެއްކަން ފާހަގަކޮށް ފުލުހުން ވަނީ އެކަންކަމަށް ސަމާލުވެ އެ ފުރުސަތުތައް ނުދިނުމަށް އިލްތިމާސްކޮށްފައެވެ.
އަދި މި ނުރައްކާތެރި ހާދިސާގައި އަލިފާން ރޯވެފައި ވަނީ ގަރާޖަކާއި އިންވެގެން ހުންނަ ގެއެއްގައި ކަމަށްވާއިރު ހާދިސާ ހިނގި ސަބަބެއް ނޭނގުނުނަމަވެސް އެ ގޭގައި ގިނަ އަދަދެއްގެ ގޭސްފުޅިތަކެއް ހުރިކަމަށް އެމްއެންޑީއެފްއިން ބުނެއެވެ.
މިހާދިސާ އާއި ގުޅިގެން މިހާތަނަށް 10 މީހުން ނިޔާވެފައި ވާއިރު، 50 އަށްވުރެ ގިނަ މީހުންވަނީ އެންޑީއެމްއޭގެ ބެލުމުގެ ދަށަށް ގެނެސްފައެވެ. އެފަރާތްތަކަށް އެހީވުމުގެ މަސައްކަތް އެ އޮތޯރިޓީން އަންނަނީ ކުރަމުންނެވެ.
Advertisement
This content is created and paid for by advertisers and does not involve Voice Journalists
