ރޭގެ އަލިފާނުގެ ހާދިސާ ހިނގި ތަނުގައި ބިދޭސީން ބިދޭސީން ދިރިއުޅެމުންދިޔައީ ކުދި ގޭބިސީ ތަކެއް ހަދައިގެން ކަމަށާ، އެތަނުގައި ކޮންމެ އެނދެއް ކައިރީ ގޭސްފުޅި އެއް ހުރި ކަމަށް އެމްއެންޑީއެފްގެ ފަޔަރ އެންޑް ރެސްކިއު ސަރވިސަސްގެ ކޮމަޑާންޓް، ކާނަލް އިބްރާހިމް ރަޝީދު ވިދާޅުވެއްޖެއެވެ.
އަލިފާނުގެ ހާދިސާއާއި ގުޅިގެން މިއަދު ބޭއްވި ޕްރެސް ކޮންފަރެސްގައި ކާނަލް އިބްރާހިމް ރަޝީދު ވިދާޅުވީ، އަލިފާނުގެ ހާދިސާ ހިނގީ 2 ފަންގިފިލާގެ އިމާރާތުގައި ހުރީ ލަކުނޑިން ހަދާފައި ހުރި ކުޑަ ކޮޓަރިތަކެއްކަމަށާއި، އެތަނުގައި ގިނަ އަދަދެއްގެ ގޭސް ފުޅިތަކެއް ހުރި ކަމަށެވެ.
އަދި އެ ކުދި ކޮޓަރިތަކުގައި 30 ވަރަކަށް ބިދޭސީން ތޮއްޖެހިގެން ދިރިއުޅެމުން އައިރު، ކޮންމެ އެނދެއް ކައިރީގައިހެން ކުޑަ އުނދުނަކާއި ގޭސް ފުޅިއެއް ހުރިކަންވެސް އޭނާ ފާހަގަކުރެއްވިއެވެ.
"މި ގަރާޖަކީ ޢާންމު ގޮތެއްގައި ވެހިކަލް މަރާމާތުކުރުމުގެ މަސައްކަތް ކުރަމުން އައި ތަނެއް. މިތަނުގައި އެބަހުރި ވަރަށް ބައިވަރު ގޭސް ސިލިންޑަރުތައް. އަދި ހަމަ އެއާއިއެކު ފުރަތަމަ އަދި ދެވަނަ ފަންގިފިލާގައި ބިދޭސީން ކައްކަން ކޮންމެ އެނދެއް ކައިރި ކަހަލަ ގޮތަކަށް އެބަހުރި ގޭސް ފުޅިތައް. އެމީހުން ދިރިއުޅެމުން އައީ ކުދި ކުދި ބިސީތަކެއް ގޮތަށް. ވަރަށް ތޮއްޖެހިފަ ހުންނަ ގޮތަށް މިތަން އިމާރާތްކޮށްފަ މިހުރީ" ކާނަލް އިބްރާހިމް ރަޝީދު ވިދާޅުވިއެވެ.
މީގެ އިތުރުން ކާނަލް ވިދާޅުވީ މިއިމާރާތުގެ ކޮޓަރިތަކުގައި ހުރީ އެންމެ ވެންޓިލޭޓަރެއް ކަމަށެވެ. އަދި އަލިފާން ހިފާފަދަ ޒާތުގެ ތަކެތި އިމާރާތްތަކުގެ އެތެރޭގައި ބަހައްޓަން ވާނީ ރަނގަޅަށް ހިމާޔަތްކުރެވި، ވެންޓިލޭޓްކުރެވިފައިވާ ތަންތަނުގައިކަމަށްވެސް ކާނަލް އިބްރާހިމް ރަޝީދު ވަނީ ފާހަގަކުރައްވާފައެވެ.
ރޭގެ ހާދިސާ އާއި ގުޅިގެން ކަންބޮޑުވުން ފާޅުކޮށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ކުރެއްވި ޓުވީޓެއްގައި ވެސް އެމަނިކުފާނު ވަނީ ދިވެހިރާއްޖޭގައި ދިރިއުޅެމުންދާ ބިދޭސީ މަސައްކަތްތެރިން ދިރިއުޅެމުންދާ ހާލަތްތައް ދެނެގަތުން މުހިންމުކަން ފާހަގަކުރައްވާފައެވެ.
Advertisement
This content is created and paid for by advertisers and does not involve Voice Journalists
