މަރުވެފައި ތިބޭ މީހުން ބޭއްތިއްބުމަށް މާލޭގައި ހުންނަ ގަލޮޅު މޮޗަރީ ފުރެން ކައިރިވެއްޖެއެވެ. 

މާލެ ސިޓީ ކައުންސިލުން ބަލަހައްޓަމުން އަންނަ އެ މޮޗަރީ އަކީ 12 މީހުންގެ ޖާގައިގެ ތަނެކެެވެ. އަދި ރޭގެ އަލިފާނުގެ ހާދިސާގައި 10 މީހުން ނިޔާވެފައިވާ ކަމަށް އެމްއެންޑީއެފުން މައުލޫމާތު ދޭއިރު އެ އެންމެންގެ ހަށިގަނޑު ވެސް ހުރީ މޮޗަރީގައި ބާއްވާފައެވެ. ވުމާއެކު ދެން އެތަނުގައި ހުރީ އެންމެ ދެމީހުންގެ ޖާގަ ކަންވެސް ފާހަގަކޮށްލަންޖެހެއެވެ. 

ރޭގެ ހާދިސާގައި ނިޔާވި މީހުންގެ ހަށިގަނޑު މޮޗަރީއަށް ލާފައިވާއިރު، އެ ސަރަހައްދަށް ގިނަ އަދަދެއްގެ ބިދޭސީން ވަނީ އެއްވެފައެވެ. އޭގެ ތެރޭގައި ގިނަ އަދަދެއްގެ އަންހެނުންނާއި ފިރިހެނުންވެސް ހިމެނެއެވެ. 

Advertisement

ބިދޭސީން ތަކެއް ގަލޮޅު މޮޗަރީ ކައިރީ--ފޮޓޯ: ވޮއިސް

ރޭ މ. ނިރުފެހި ގޭގައި ހިނގި އަލިފާނުގެ ހާދިސާއަކީ، ފަހުގެ ތާރީޚެއްގައި ރާއްޖޭގައި ހިނގައިދިޔަ އެންމެ ނުރައްކާތެރި އަލިފާނުގެ އެ ހާދިސާއަށްވާއިރު، އެ ހާދިސާގައި ނިޔާވެފައި ވަނީ ބިދޭސީން ކަމަށް މައުލޫމާތު ލިބެއެވެ.

އެގޮތުން، ހާދިސާ ހިނގައިދިޔަ ސަރަހައްދުގެ ހާލަތު ބައްލަވައި ލެއްވުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވަޑައިގެން ނޫސްވެރިންނަށް މައުލޫމާތު ދެއްވަމުން އެމަނިކުފާނު ވަނީ، އެތަނުގައި ލަންކާ މީހުންނާއި، އިންޑިއާ މީހުންގެ އިތުރުން ބަންގްލަދޭޝްގެ މީހުން އުޅުނު ކަމަށް ވިދާޅުވެފައެވެ. 

އަދި އެ ހާދިސާގައި ނިޔާވި މީހުންގެ މައުލޫމާތު އެއްކުރުމަށް މިހާރު ފުލުހުން މަސައްކަތް ކުރަމުންދާއިރު، މ. ނިރުފެހި އަދި މ. ސެންޑް ރޯސް ގައި ދިރިއުޅޭ މީހުންގެ މައުލޫމާތާއި އެ ގޭގެއަށް ރޭ ގޮސްފައިވާކަމަށް ބެލެވޭ މީހުންގެ މައުލޫމާތު އަދި މާލޭގައި ދިރިއުޅޭ ބިދޭސީންގެ ތެރެއިން، ރެއިންފެށިގެން ހަބަރެއް ވެފައި ނުވާ ބިދޭސީންގެ މައުލޫމާތު ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓްގެ ނަންބަރު 9911099 ނުވަތަ ދިވެހި ފުލުހުންގެ ޚިދުމަތުގެ ހޮޓްލައިން ނަންބަރު 3322111 އަށް ގުޅުއްވައި ހިއްސާ ކުރެއްވުމަށް ފުލުހުން ވަނީ އެދިފައެވެ.