މާލޭ ސިޓީގައި ހުރި ގަރާޖް ތަކާއި، ވޯކްޝޮޕް އަދި ކެމިކަލްގުދަންފަދަ ތަންތަން މާލޭގެ އިންޑަސްޓްރިއަލް ވިލެޖްގައި ބޭނުންނުކޮށް އޮތް ސަރަޙައްދަށް ނަމަވެސް ބަދަލުކުރެވޭނެ އިންތިޒާމެއް ހަމަ ޖައްސައިދެއްވުމަށް މާލެ ސިޓީ ކައުންސިލުން ގޮވާލައިފިއެވެ.
9 ނޮވެމްބަރު 2022 ވީ ބުދަ ދުވަހުގެރޭ މ. ނިރުފެހި ގޭގައި ހިނގާދިޔަ ނުރައްކާތެރި އަލިފާނުގެ ހާދިސާއާއި ގުޅިގެން އެ ހާދިސާގައި ނިޔާވި ހުރިހާ މީހުންގެ އާއިލާއަށް ތައުޒިޔާ ދަންނަވައި މާލެ ސިޓީ ކައުންސިލުން ނެރުނު ބަޔާނުގައި ބުނީ، މާލޭ ސިޓީ ކައުންސިލުން އަބަދުވެސް މަސައްކަތް ކުރަމުންދަނީ މާލޭ ސިޓީގައި ދިމާވާ އެފަދަ ނުރައްކާތެރި ހާދިސާތައް މަދުކުރުމަށާއި، ރައްކާތެރިކަމުގެ ފިޔަވަޅުތައް އެޅުމަށްޓަކައި ކަމާ ގުޅުންހުރި މުއައްސަސާތަކާ ގުޅިގެން ކުރެވެންހުރި މަސައްކަތްތައް ކުރަމަށް ކަމަށެވެ.
އެގޮތުން މާލޭ ސިޓީގައި ހުރި ގަރާޖް ތަކާއި، ވޯކްޝޮޕް އަދި ކެމިކަލްގުދަންފަދަ ތަންތަން މާލޭގެ އިންޑަސްޓްރިއަލް ވިލެޖަށް ބަދަލުކުރުމުގެ ގޮތުން މާލެ ސިޓީގެ ރައްޔިތުންގެ ޚިޔާލާއި މަޝްވަރާގެ ހޯދުމަށްފަހު މާލެ ސިޓީގެ ލޭންޑް ޔޫސް ޕްލޭން ތައްޔާރުކުރެވިފައިވާކަން ފާހަގަކޮށް ސިޓީ ކައުންސިލުން ބުނީ، މި ލޭންޑް ޔޫސް ޕްލޭން ފާސްވުމުން މާލޭސިޓީގެ މާލެއާއި ވިލިމާލޭގެ މީހުން ދިރިއުޅޭ ސަރަހައްދު ތަކުގައިހުރި މިފަދަ ތަންތަން މާލޭ އިންޑަސްޓްރިއަލް ވިލެޖަށް ބަދަލުކުރުމުގެ މަސައްކަތް ކުރުމަށް ނިންމާފައިވާ ކަމަށެވެ.
ވުމާއެކު، މާލޭ ސިޓީގައި ދިމާވާ މިފަދަ ނުރައްކާތެރި ހާދިސާތަކުން ސަލާމަތްވުމަށްޓަކައި، މާލޭގެ އިންޑަސްޓްރިއަލް ވިލެޖަކީ މާލެ ސިޓީގައި އާންމުން ދިރިއުޅޭ ސަރަޙައްދުގައި ހުރި ގަރާޖް ތަކާއި، ވޯކްޝޮޕް އަދި ކެމިކަލް ގުދަންފަދަ ތަންތަން ބަދަލުކުރުމަށް ކަނޑައަޅާ ތަނެއްގެ ގޮތުގައި ހަމަޖައްސަވައިދިނުމަށާއި އަދި މިހާރުން މިހާރަށްވެސް މާލޭގެ އިންޑަސްޓްރިއަލް ވިލެޖްގައި ބޭނުންނުކޮށް އޮތް ސަރަޙައްދަށް ނަމަވެސް މިފަދަ ތަންތަން ބަދަލުކުރެވޭނެ އިންތިޒާމެއް ހަމަ ޖައްސަވައިދެއްވުމަށް ކަމާއި ގުޅުންހުރި އެންމެހައި އިދާރާތަކަށް ސިޓީ ކައުންސިލުން ވަނީ ގޮވާލާފައެވެ.
މީގެ އިތުރުން އެ ބަޔާނުގައި ވަނީ، މިފަދަ ހިތާމަވެރި ހާދިސާތައް މާލޭ ސިޓީގައި ހުއްޓުވޭނީ މިފަދަ ގަރާޖުތަކާއި ވޯކުޝޮޕްތައް ހިންގާ ފަރާތްތަކުން އަދި އެހެނިހެން މަސައްކަތް ކުރާ ފަރާތްތަކުންވެސް އެތަނެއްގައި ހުންނަންޖެހޭ ރައްކާތެރިކަމުގެ ފިޔަވަޅުތައް އެޅުމަށް ދޭންޖެހޭ އިސްކަން ދީގެން ކަން ފާހަގަކޮށް، މާލޭ ސިޓީގައި މިފަދަ މަސައްކަތްކުރާ ތަންތަން ހިންގާފަރާތްތަކުން ކުރިއަށް އޮތްތަނުގައި މިފަދަ ހިތާމަވެރި ހާދިސާތައް ހުއްޓުވުމަށް އެޅެންއޮތް އެންމެހައި ފިޔަވަޅުތައް އެޅުމަށް ކުރެވެންހުރި އެންމެހައި މަސައްކަތްތައް ކުރުމަށް ވެސް ކަމާގުޅުންހުރި އެންމެހައި ފަރާތްތަކަށް ގޮވާލާފައެވެ.
މިއާއެކު އެ ބަޔާނުގައި ވަނީ، މިހިގާދިޔަ އަލިފާނުގެ ހާދިސާ އާއި ގުޅިގެން މިކަމުގައި އިހުމާލުވެފައިވާ ފަރާތްތަކަކީ ކޮބައިކަން ބައްލަވައި ނުވަތަ މިކަމުގައި ޝާމިލްވާ ފަރާތްތަކަކީ ކޮބައިކަން ބަލައި އެފަދަ ފަރާތްތަކާމެދު އަޅަންޖެހޭ ފިޔަވަޅުތައް އެޅުމަށް ކަމާގުޅުންހުރި މުއައްސަސާތަކަށް ގޮވާލާފައެވެ.
Advertisement
This content is created and paid for by advertisers and does not involve Voice Journalists
