ތިލަފުށީގައި މިވަގުތު 34 ކެމިކަލް ގުދަން އެބަހުރި ކަމަށާ, އަދި އޭގެ އިތުރުން، އިތުރު 18 ގުދަނުގެ މަސައްކަތް މިހާރުވެސް ކުރިއަށްދާ ކަމަށް އެޗްޑީސީން ބުނެފިއެވެ.

ބުދަ ދުވަހުގެރޭ މާލޭގައި ހިނގާދިއަ އަލިފާނުގެ ހާދިސާ އާއި ގުޅިގެން ބައެއް މީޑިއާތަކުން މާލޭގައި މިވަގުތު 18 ކެމިކަލް ވެއަރ ހައުސް ހުރިކަމަށް ބުނެ ފަތުރާފައިވާ ވާހަކަ އާއި ގުޅިގެން ވޮއިސް އަށް މައުލޫމާތު ދެމުން އެޗްޑީސީން ބުނީ، މީގެ ކުރިން މާލޭގައި ކެމިކަލް ގުދަނެއް ގޮވައިގެން ހިނގި ހިތާމަވެރި ހާދިސާ އާއި ގުޅިގެން އެފަދަ ހުރިހާ ތަނެއް ތިލަފުށްޓަށް ބަދަލު ކުރުމުގެ މަސައްކަތް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މި ސަރުކަާރުން އެޗްޑީސީ އާއި ހަވާލުކޮށްފައިވާ ކަމަށެވެ. 

އެގޮތުން، އެޗްޑީސީން ކުރި މަސައްކަތުން މިހާރު މާލޭގައި ހުރި 34 ކެމިކަލް ގުދަން ތިލަފުށްޓަށް ބަދަލުކުރެވިފައިވާ ކަމަށްވެސް އެ ކޯޕަރޭޝަނުން ބުންޏެވެ. އަދި މީގެ އިތުރުން، ކުރިއަށް އޮތް ތަނުގައިވެސް އިތުރު ކެމިކަލް ގުދަން ބޭނުންވެދާނެ ކަމަަށް ބަލައި، 18 ގުދަނެއް ހެދުމުގެ މަސައްކަތް މިހާރުވެސް ކުރިއަށްދާ ކަމަށާ، އެކަން ނިމުމަކާއި ގާތަށް އައިސްފައިވާ ކަމަށްވެސް އެޗްޑީސީން ބުނެއެވެ. 

"...އިތުރު ގުދަން ތަކެއް މިހާރު، އިންކޭސް ފިއުޗާގައިވެސް އިތުރު ގުދަން ތަކެއް އައިސްދާނެ ކަމަށް ބަލާފައި، އެޗްޑީސީން، އެސްޖޭ ކޮންސްޓްރަކްޝަނާއި ހަވާލު ކޮށްގެން ޑިވެލޮޕް ކުރެވެމުންދާ ތަނެއް. މިތަނަކީ، މިތަނުގައި 28 ވެއަރ ހައުސް ހަދަން ނިންމާފައިވާ ތަނެއް. ކުރީގައި އިންނާނެ 34 ގުދަނެއް ބަދަލު ކުރެވޭ ވަރުގެ ވެއަރ ހައުސް އެއް ހަދައި ދެވިފައި" އެޗްޑީސީން ބުންޏެވެ. 

މާލޭގައި 18 ކެމިކަލް ގުދަން ހުރިކަމަށް ބުނާ ވާހަކަ ދޮގުކޮށް އެޗްޑީސީން ވަނީ ބަޔާނެއްވެސް ނެރެފައެވެ.

އެ ބަޔާނުގައި އެޗްޑީސީން ބުނީ މާލޭގައި މިވަގުތު 18 ކެމިކަލް ވެއާރ ހައުސްއެއް ހުރިކަމަށް ބުނެ ލިޔެފައިވާ ހަބަރަކީ އެއްވެސް ސައްޙަ މަޢޫލޫމާތަކަށް ބިނާކޮށް ގެނެސްދީފައިވާ ހަބަރެއް ނޫންކަމަށެވެ. އަދި މިވަގުތު ތިލަފުށީގައި 34 ކެމިކަލް ވެއަރ ހައުސްއެއް ޤާއިމުކުރެވިފައިވާކަމަށާއި އިތުރު 18 ވެއާރ ހައުސްއެއް ޤާއިމު ކުރުމުގެ މަސައްކަތް ކުރެވެމުންދާކަމަށް އެޗްޑީސީން ބުނެއެވެ.

އެޗްޑީސީގެ ބަޔާނުގައި އިތުރަށް ބުނީ، އެއްވެސް ހާލަތެއްގައި އެ 18 ވެއާރ ހައުސްއަކީ މިވަގުތު މާލޭގައި ހުރި ތަންތަން ބަދަލު ކުރުމަށް ކުރެވޭ މަސައްކަތެއް ކަމުގައި މަޢޫލޫމާތު ދީފައި ނުވާނެކަމަށެވެ. އެހެންކަމުން މިކަހަލަ ހައްސާސް ދަނޑިވަޅެއްގައި އާއްމުންގެ މެދުގައި ބިރުވެރިކަން އުފެދޭގޮތަށާއި ޒިންމާދާރުކަން ކުޑަ ގޮތަކަށް ހަބަރު ފަތުރާ ފަރާތްތަކުން ހަބަރުތައް ގެނެސް ދިނުމަކީ އެ ކުންފުނިން ނުހަނު ހިތާމަ ކުރާކަމެއް ކަމުގައި އެޗްޑީސީން ބުނެއެވެ.