އަދާލަތު ޕާޓީގެ ހިތަދޫ އުތުރު ދާއިރާގެ ރައީސް އިނާޒް މުހައްމަދު ދީދީ އިދިކޮޅު ޕީޕީއެމް އާ ގުޅިވަޑައިގެންފި އެވެ.

އިދިކޮޅު ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް އައްޑޫ ސިޓީއަށް ކުރައްވަމުންދާ ދަތުރުފުޅުގައި އައްޑޫ ސިޓީގެ މިހާތަނަށް ވަޑައިގެންފައިވާ ހުރިހާ ރަށަކުންވެސް ޕީޕީއެމާއި ގިނަ ފަރާތްތަކެއް ގުޅިފައިވާ ކަމަށް އިދިކޮޅުން ބުނެއެވެ. އަދި އެ ގުޅުނު ފަރާތްތަކުގެ ފޯމާއި އެމަނިކުފާނު ވަނީ ހަވާލުވެވަޑައިގެންފައެވެ.

އެގޮތުން ޕީޕީއެމާއި ގުޅުނު މީހުންގެ ތެރޭގައި ހިތަދޫގެ މަޝްހޫރު ވިޔަފާރިވެރިޔާ މުހައްމަދު ދީދީގެ ދަރިކަލުން އަދި އަދާލަތު ޕާޓީގެ ހިތަދޫ އުތުރު ދާއިރާގެ ރައީސް އިނާޒް މުހައްމަދު ދީދީ ހިމެނޭ ކަމަށް ޕީޕީއެމުން ބުނެއެވެ. 

Advertisement

އިނާޒުގެ އިތުރުން އައްޑޫސިޓީ ހިތަދޫ ދެކުނު ދާއިރާގެ އެމްޑީޕީ މަޖިލިސް މެންބަރު އިބްރާހިމް ނާޒިލް ކޮއްކޮ އާއި އެރަށު އެމްޑީޕީ ގެ ގިނަ މީހުން ޕީޕީއެމާއި ގުޅިފައިވާކަމަށް ޕީޕީއެމުން ބުނެއެވެ. މީގެ އިތުރުން އައްޑޫ ސިޓީ މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ) ގެ މަންމަ އާއި އެ އާއިލާއަށް ނިސްބަތްވާ އިތުރު 6 މީހަކުވެސް ވަނީ ޕީޕީއެމާއި ގުޅިފައެވެ. 

ރައީސް ޔާމީން އައްޑޫސިޓީ އަށް ކުރައްވާ މިދަތުރު ފުޅުގައި އައްޑޫގެ ހުރިހާ ރަށަކަށް ވަޑައިގެން، އެ ސިޓީގެ ރައްޔިތުންނާއި ބައްދަލުކުރައްވައި، ރަށްރަށުގައި އޮތް ޕީޕީއެމްގެ ސްޓިއަރިން ކޮމެޓީތަކާއި، ކައުންސިލްތަކާއިވެސް ބައްދަލުކުރެއްވުމަށް ވަނީ ނިންމަވާފައެވެ.