ބުދަ ދުވަހުގެ ރޭ ދަންވަރު މ. ނިރުފެހިގައި އަލިފާން ރޯވެ ހިނގި ނުރައްކާތެރި އަލިފާނުގެ ހާދިސާގައި ނިޔާވި ނުވަ މީހުންގެ ޖިންސާއި ގައުމު ދެނެގަނެވިފައިވާ ކަމަށް ފުލުހުން ބުނެފިއެވެ. 

ފުލުހުން މިއަދު ބުނީ، ނޮވެމްބަރު 10 ވަނަ ދުވަހުގެރޭ ދަންވަރު ގާތްގަނޑަކަށް 12:27 ހާއިރު މ.ނިރުފެހި ގޭގައި ހިނގި އަލިފާނުގެ ހާދިސާގައި ނިޔާވެފައިވާ 10 މީހުންގެ ތެރެއިން މިހާތަނަށް ހަށިގަނޑު ދެނެގަނެވިފައިވަނީ 9 މީހުންގެ ކަމަށެވެ. 

އެގޮތުން، ދެނެ ގަނެވިފައިވާ މީހުންގެ ތެރެއިން އިންޑިއާއަށް ނިސްބަތްވާ 3 އަންހެނުންނާއި ހަތަރު ފިރިހެނުން ހިމެނޭއިރު، ބަންގްލަދޭޝް އަށް ނިސްބަތްވާ 1 އަންހެނަކާއި 1 ފިރިހެނެއް ހިމެނޭ ކަމަށް ފުލުހުން ބުނެފައިވެއެވެ. އަދި މީގެ އިތުރުން، ކޮން ގައުމެއްގެ މީހެއްކަން މިހާތަނަށް ދެނެގަނެވިފައި ނުވާ އެކެއް ހިމެނޭ ކަމަށާ، އެއީ ފިރިހެނެއް ކަމަށްވެސް ފުލުހުން ބުނެފައިވެއެވެ. 

މީގެ އިތުރުން މި މައްސަލަ އަދިވެސް ތަހުގީގު ކުރަމުންދާ ކަމަށް ފުލުހުން ބުނެފައިވެއެވެ.