ދީނީ ކަންކަމުގައި ޢިލްމުވެރީންގެ ބަސް އަޑުއަހައި އެކަމަށް އިޖާބަ ދިނުމުގައި ކުރީގެ ރައީސް ޔާމީން އަބްދުލްގައްޔޫމް ގެ ސަރުކާރުން ކަން ކުރެއްވި ގޮތާއި، އަދުގެ ރައީސް އިބްރާހިމް މުހައްމަދު ޞާލިހު ކަން ކުރައްވަމުން އަންނަގޮތް ރައްޔިތުންނަށް ސާފުވާންޖެހޭ ކަމަށް ޖަމިއްޔަތުއްސަލަފްގެ ރައީސް އައްޝައިޚް އަބްދުﷲ ބިން މުހައްމަދު ވިދާޅުވެއްޖެއެވެ. 

30 އަހަރަށްވުރެ ގިނަ ދުވަހުގެ މެދުކެނޑުމަކަށްފަހު މާލޭގެ މެދުޒިޔާރަތުގައި އިހު ހުރި ގޮތަށް އަލުން ދިދަ ނަގަން މި ސަރުކާރުން ފެށުމާއި ގުޅިގެން ކަންބޮޑުވުން ފާޅުކޮށް ޝެއިޚް އަބްދުﷲ ކުރެއްވި ޓުވީޓެއްގައި ވިދާޅުވީ، ‏ރާއްޖެއިސްލާމްވި ދުވަސް ފާހަގަކުރުމުގެ ގޮތުން މެދުޒިޔާރަތް އާއްމުންނަށް ހުޅުވާލައިގެން ދައްކާލުމުގެ ހުރިހާ ތައްޔާރީއެއް ކުރީގެ ރައީސް ޔާމީން އަބްދުލްގައްޔޫމް ގެ ސަރުކާރުން ކޮށްފައިވަނިކޮށް، ދީނީ ޢިލްމުވެރީން އެކަމަށް ނުރުހުން ފާޅުކުރުމާ ގުޅިގެން އެމަނިކުފާނު ޢިލްމުވެރިންނަށް އިޖާބަދެއްވައި އެކަން ހުއްޓުވާފައިވާ ކަމަށެވެ. 

އަދި އެފަދަ ކަންކަން ފެންނާން ހުރުމުން ރައީސް ޔާމީންގެ ސަރުކާރާ، އަދުގެ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ސަރުކާރުގެ ތަފާތު ރައްޔިތުންނަށް ސާފުވާންޖެހޭ ކަމަށްވެސް ޝެއިޚް ވިދާޅުވިއެވެ. 

"މިފަދަ އެތައްކަމެއް އަދާލަތު ޕާޓީއިން އިންކާރުނުކޮށް ތިއްބަވައި، ސަރުކާރު ދިފާޢު ކުރައްވަމުން ދިއުމީ ޕާޓީގެ އިތުބާރު ގެއްލުނު ސަބަބެވެ." ޝެއިޚް އަބްދުﷲ ވިދާޅުވިއެވެ. 

ގާތްގަނޑަކަށް 30-35 އަހަރުގެ މެދުކެނޑުމަކަށް ފަހު މެދުޒިޔާރަތުގައި ދިދަ ނަގަން ފެށީ އިއްޔެ އެވެ. އެ ޒިޔާރަތުގައި ހުރި ދިދަ ދަނޑިތަކުގައި މިހާރު ހުރީ ރާއްޖޭގައި އެންމެ އިހުޒަމާނުގައި ވެސް ހުންނަ ގޮތަށް ހުދު ދިދަ ނަގައިފަ އެވެ.

ރާއްޖޭގެ ސަގާފަތާއި ތާރީހަށް ހިދުމަތް ކުރާ ގައުމީ މަރުކަޒުން ބުނެފައިވާ ގޮތުގައި މެދުޒިޔާރަތުގައި އަލުން ދިދަ ނަގަން ފެށީ މާލޭގައި ހުރި އާސާރީ ތަންތަން ކުރީގައި ހުރި ގޮތަށް އަނބުރާ އިއާދަކޮށް، ދިވެހި ސަގާފަތާއި ތާރީހު ދެމެހެއްޓުމަށް އެ މިނިސްޓްރީއިން ކުރަމުން އަންނަ މަސައްކަތުގެ ތެރެއިން ކަމަށެވެ.

އެހެންނަމަވެސް، މި ކަމަކީ ބިދުޢަ އަކަށް މަގުފަހި ވެގެން ދާނެ ކަމެއް ކަން ފާހަގަކުރައްވައި ގިނަ ޢިލްމުވެރިން އަންނަނީ ކަންބޮޑުވުން ފާޅުކުރަމުންނެވެ.