މަސްވެރިންނަށް ދޭން ޖެހޭ ފައިސާ ނުދައްކާއިރު ރައްޔިތުން ސަރުކާރަށް ޓެކްސް ދައްކަންވީތޯ އައްސަވާ މަޖިލީހުގެ މާވަށު ދާއިރާގެ މެމްބަރު ކުރީގެ އިކޮނޮމިކް މިނިސްޓަރު މުހައްމަދު ސައީދު ނުރުހުން ފާޅުކުރައްވައިފިއެވެ. 

މަސްކިރުމަށްފަހު ފައިސާ ނުދައްކާތީ ލ، ތ އަދި ބ އަތޮޅުގެ މަސްވެރިން މިއަދު ވަނީ މާންދޫ ފިޝަރީސް ކޮންޕްލެކްސްގައި އިހުތިޖާޖުކޮށްފައެވެ. 

އެ އިހުތިޖާޖުގެ ބައެއް ފޮޓޯތައް ޓްވީޓާގައި ހިއްސާކުރައްވާ ސައީދު ކުރެއްވި ޓްވީޓެއްގައި ވިދާޅުވީ ބޭނި މަސްކޮޅަށް ފައިސާ ނުލިބިގެން މަސްވެރިން ޝަކުވާ ކުރަމުންދާތާ އެތައް ދުވަހެއް ވެފައިވާއިރު، ސަރުކާރުން އެ ޝަކުވާތަކަށް އިޖާބަދީފައި ނުވާކަމަށެވެ. 

Advertisement

މަސްވެރިން ބޭނި މަސްކޮޅަށް ފައިސާ ހޯދުމަށް މަސްވެރިންދަނީ ސަލާން ޖަހަމުންކަމަށާއި، މަސްވެރިންގެ ހުރި ކަންބޮޑުވުންތަކަށް ހައްލު ހޯދައިދިނުމަށް ސަރުކާރުން އެކަށީގެންވާ މަސައްކަތްތަކެއް ކުރަމުން ނުދާކަމަށް ސައީދު ވިދާޅުވިއެވެ. 

އެއާއެކު ސައީދު ވަނީ ސަރުކާރުން މަސްވެރިންނަށް ދޭން ޖެހޭ ފައިސާ ދިނުމަށް އުޒުވެރިވަމުން ދާއިރު އަދިވެސް ރައްޔިތުން އަތުން ނަގާ ޓެކްސް ބޮޑުކުރަންވީތޯ އައްސަވާ ސުވާލު ކުރައްވާފައެވެ. 

މާންދޫގައި ކުރިއަށް ގެންދިޔަ މުޒާހަރާގައި މަސްވެރިން ބޭނުންކުރި ބެނާއެއް 

މަސްވެރިން ބާނާ މަސްކޮޅަށް ސަރުކާރުން ފައިސާ ނުދީ ރައްޔިތުން އަތުން ނަގާ ޓެކްސް ބޮޑު ކުރަން މަސައްކަތް ކުރުމާއި ގުޅިގެން ސައީދު ނުރުހުން ފާޅުކުރައްވާފައިވާއިރު، އަންނަ އަހަރުގެ ޖެނުއަރީ މަހުން ފެށިގެން ރައްޔިތުން އަތުން ނަގާ ޓެކްސް 6 އިންސައިން 8 އިންސައަށް ބޮޑުކުރުމަށް ސަރުކާރުން ވަނީ ނިންމާފައެވެ. 

އެ ނިންމުމަށް މަޖިލީހުގައި ބައެއް މެމްބަރުން ދެކޮޅު ހަދަމުން ދިޔަނަމަވެސް އެމްޑީޕީގެ ޕީޖީ ގުރޫޕުން ވަނީ ސަރުކާރުން އެދިފައިވާ ގޮތަށް ޓެކްސް ބޮޑުކުރާ ބިލު ފާސްކުރުމަށް ވިޕް ނެރެފައެވެ. އަދި އެ ވިޕާއި ޚލާފުވާ މެމްބަރުންނާއި ދޭތެރޭގައި ފިޔަވަޅު އަޅާނެކަމަށް އަންގާ އިންޒާރުދީފައެވެ.