ރައްޔިތުން އަތުން ނަގާ ޓެކްސް ބޮޑު ކުރުމަށް ސަރުކާރުން ނިންމާފައިވާ ނިންމުމާއި ދެކޮޅަށް އިދިކޮޅު ޕީޕީއެމް/ޕީއެންސީ ކޯލިޝަނުން މަޖިލީހުގެ އިދާރާ ކައިރީ މިއަދު ބޭއްވި މުޒާހަރާގެ ތެރެއިން ތިން މީހަކު ހައްޔަރުކޮށްފިއެވެ.

މިއަދު މެންދުރު ކުރި އެ އިހްތިޖާޖު ގެ ތެރެއިން އިދިކޮޅުން ވަނީ ރައީސް އިބްރާހީމް މުޙައްމަދު ޞާލިޙާއި ރައްޔިތުންގެ މަޖިލީހުގެ މެންބަރުން އިސްތިއުފާދެއްވުމަށް ގޮވާލާފައެވެ. އަދި ސަރުކާރުން ޚަރަދު ކުޑަނުކޮށް ރައްޔިތުންގެ އަތުން ނަގާ ޓެކުސް ބޮޑުކުރުމަކީ ރައްޔިތުން ނިކަމެތިވެފައިވާ ދަނޑިވަޅުގައި އިތުރަށް ނިކަމެތިކޮށްލުން ކަމަށް ބުނެ މުޒާހަރާގެ ބައިވެރިން ވަނީ ނުރުހުން ފާޅުކޮށްފައެވެ. 

މި މުޒާހަރާ ފެށިތާ މާ ގިނައިރެއް ނުވަނީސް ފުލުހުން ވަނީ މުޒާހަރާގެ ބައިވެރިންނަށް ހުރަސް އަޅާފައެވެ. އެގޮތުން ހިނގައިދިޔަ ހަމަނުޖެހުންތަކާއި ގުޅިގެން ތިން މީހަކު ހައްޔަރުކޮށްފައިވާކަމަށް އިދިކޮޅު އިއްތިހާދުގެ ތަރުޖަމާން ހީނާ ވަލީދު ވަނީ ވިދާޅުވެފައެވެ. 

ޓެކްސް ބިލާއި ދެކޮޅަށް ކުރި މުޒާހަރާގެ ތެރެއިން--ފޮޓޯ: ޕީޕީއެމް 

އަންނަ ޖެނުއަރީމަހުން ފެށިގެން ރައްޔިތުން އަތުން ނަގާ ޓެކްސް ނުވަތަ ޖީއެސްޓީ ބޮޑުކުރުމަށް ސަރުކާރުން މަޖިލީހަށް ބިލު ހުށައަޅާފައިވާއިރު މަޖިލީހުން އެ ބިލު ފާސްކޮށްފިކަމަށް ވާނަމަ ޖީއެސްޓީ 6 އިންސައިން 8 އިންސައްތައަށް އަދި ޓީޖީއެސްޓީ 12 އިން 16 ޕަސެންޓަށް އުފުލިގެންދާނެއެވެ. އެއާއެކު ތަނެތީގެ އަގުތަކަށްވެސް ބޮޑެތި ބަދަލުތަކެއް އަންނާނެއެވެ. 

އެ ނިންމުމަށް މަޖިލީހުގައި ބައެއް މެމްބަރުން ދެކޮޅު ހަދަމުން ދިޔަނަމަވެސް އެމްޑީޕީގެ ޕީޖީ ގުރޫޕުން ވަނީ ސަރުކާރުން އެދިފައިވާ ގޮތަށް ޓެކްސް ބޮޑުކުރާ ބިލު ފާސްކުރުމަށް ވިޕް ނެރެފައެވެ. އަދި އެ ވިޕާއި ޚލާފުވާ މެމްބަރުންނާއި ދޭތެރޭގައި ފިޔަވަޅު އަޅާނެކަމަށް އަންގާ އިންޒާރުދީފައި ވާއިރު، މިދިޔަ އޮކްޓޯބަރ މަހުގެ 31 ވަނަ ދުވަހު، ސަރުކާރުގެ އެ ބިލަށް މެމްބަރުން ހުށަހެޅި އިސްލާހުތައް ބޭރު ކޮށްލައި ސަރުކާރުން ފޮނުވި ގޮތަށް މުޅި މަޖިލީހުގެ ކޮމިޓީން އެ ބިލު ވަނީ ފާސް ކޮށްފައެވެ. 

އެހެންނަމަވެސް، އެ އެ ބިލަށް ބަހުސް ކުރުމަށް މިއަދު އޮތް މަޖިލީހުގެ ޖަލްސާގައި ހުޅުވާލުމުން ބަހުސްގައި އެއްވެސް މެންބަރަކު ބައިވެރިވެފައި ނުވާއިރު، ވޯޓަށް އެހުމަށް މަޖިލީހުގައި ކޯރަމް ވެސް ހަމަ ނުވާތީ އެކަން ކުރިއަށް ގެންދެވޭގޮތް ވަނީ ނުވެފައެވެ.