މާލެ ސިޓީގެ ބޮޑުތަކުރުފާނު މަގުގެ ތާރުގަނޑުގެ އަޑިން ސްޓެލްކޯއަށް ލޮނުފެން ނެގުމަށް އަޅާފައިވާ ހޮޅިއެއް ލީކުވުމުގެ ސަބަބުން އެ ސަރަހައްދުން ބޮޑު ތަންގަނޑެއް ގަނބައިގަނެފައިވަނިކޮށް ސްޓެލްކޯއިން އެ ހޮޅި މަރާމާތު ކުރުމަށްފަހު މަގުގެ އެތަން އެއްހަމަ ކުރީ މާލެ ސިޓީ ކައުންސިލްގެ ބެލުމުގެ ދަށުން ކަމަށް އެ ކުންފުނިން ބުނެފިއެވެ.
ބޮޑުތަކުރުފާނު މަގުގެ އެތަނުގައި މާކެ ސިޓީ ކައުންސިލްގެ ހުއްދައާއި ނުލައި ސްޓެލްކޯއިން ކޮންކްރީޓް އަޅާފައިވާ ކަމަށް ބުނެ ބައެއް މީޑިއާތަކުން ރިޕޯޓު ކުރުމާއި ގުޅިގެން އެކަން ދޮގުކޮށް ސްޓެލްކޯއިން މިއަދު ބުނީ، އެ މަގުގެ އެތަން 7 ފޫޓަށް ކޮނުމާއި ގުޅިގެން ދެވަރުގެ އަޑިވެފައިވާތީ އެތަނުގައި ސިމެންތި އަޅާފައިވަނީ މަގު އެއްހަމަ ކުރަން ކަމަށެވެ.
އަދި އެކަން ކޮށްފައިވާނީވެސް މާލެ ސިޓީ ކައުންސިލްގެ ބެލުމުގެ ދަށުންކަން ފާހަގަކޮށް ސްޓެލްކޯއިން ބުނީ، ކޮންޓްރެކްޓަރަކު ހަމަޖެހުނުހާ އަވަހަށް ސިމެންތީ އަޅާފައިވާ ތަނުގައި ތާރު އަޅާނެ ކަމަށެވެ.
އަދި އެގޮތުން ތާރު އަޅާއިރު އެ މަގުގައި ހަލާކުވެފައި ހުރި އެހެން ތަންތަންވެސް ހެދުމަށް ސްޓެލްކޯއިން ހުށަހަޅާފައިވާނެކަމަށް އެ ކުންފުނިން ބުނެއެވެ.
ސްޓެލްކޯ އިން މާލެ އަށް ކަރަންޓު ދޭން ބޭނުން ކުރާ ޕްލާންޓެއްގެ އިންޖީނުތަކުގެ ކޫލިން ސިސްޓަމުގައި ބޭނުންކުރާ އައުޓްފްލޯ ހޮޅިއެއް ފަޅައިގެން ގޮސް މަގަށް ލޮނު ލީކުވާ މައްސަލަ ހައްލުކޮށް، އެ ހޮޅި ހެދުމަށް ކޮނެފައިވާ ވަޅު ބައްދައިލަން ސިމެންތި އެޅުމަށްފަހު ސްޓެލްކޯއިން ވަނީ މިހާރު އެ މަގު ހުޅުވާލާފައެވެ.
Advertisement
This content is created and paid for by advertisers and does not involve Voice Journalists
