ބައެއް ފަރާތްތަކުން ކުރިއަށް ގެންދާ އިހްތިޖާޖު ތަކާއި އެއްވުންތަކާއު ގުޅިގެން އާއްމު ފަރުދުންނަށް އުނދަގޫވާތީ، އެފަދަ އެއްވުންތައް ފުލުހުން ރޫޅާ ނުލައިގެންވެސް އާއްމުން ޝަކުވާ ކޮށްފައިވާކަމަށް ހޯމް މިނިސްޓަރ ޢިމްރާން ވިދާޅުވެއްޖެއެވެ.
ޢިމްރާން މިފަދައިން ވިދާޅުވީ ހޯމް މިނިސްޓްރީއާއި ފުލުހުން އަދި ކަރެކްޝަނަލް ސާރވިސް ގުޅިގެން، ހޯމް ސެކްޓަރގެ މަސައްކަތްތަކާއި ގުޅޭގޮތުން މަޢުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވެރިކަމަށް ވަޑައިގެންނެވުމުގެ ކުރިން، ރައްޔިތުންނަށް އެއްވެ އުޅުމުގެ މިނިވަންކަން ދެއްވާނެ ކަމަށް ވައުދުވެވަޑައިގެންފައި ވީނަމަވެސް، ވެރިކަމަށް ވަޑައިގެންނެވި ފަހުން ބޭއްވި އެއްވުންތައް ބާރުގެ ބޭނުން ކޮށްގެން ރޫޅާލާތަން ފެންނަމުންދާ ކަން ފާހަގަކޮށް އެއްވެ އުޅުމުގެ މިނިވަންކަން ރައްޔިތުންނަށް ދޭން ސަރުކާރުން ވިސްނަނީ ކޮން އިރަކުތޯ އަހައި ނޫސްވެރިއެއް ކުރި ސުވާލަށް ޖަވާބު ދެއްވަމުންނެވެ.
ޢިމްރާން ވިދާޅުވީ އެއްވެ އުޅުމުގެ ގާނޫނަށް މި ސަރުކާރު އައި ފަހުން އެއްވެސް އިސްލާހެއް ގެނެސްފައި ނުވާ ކަމަށެވެ. އަދި ގާނޫނުގެ ތެރެއިން އެއްވެ އުޅުމުގެ މިނިވަންކަން ދެވެންއޮތް އެންމެ ފުޅާ މިނެއްގައި މި ސަރުކާރުން ދެމުން އަންނަކަން ފާހަގަ ކުރައްވައި އިމްރާން ވިދާޅުވީ އެއްވެ އުޅުންތަކަށް ހުރަސް އަޅާ ވާހަކަ ދައްކާއިރު ބަލަންވާނީ ކުރީ ސަރުކާރުން އެއްވެ އުޅުންތަކަށް ހުރަސް އެޅި މިންވަރަށް މި ސަރުކަާރުން ހުރަސް އެޅިތޯ ކަމަށެވެ. އެގޮތަށް ބަލާނަމަ ކުރީގައި އެއްވެއުޅުންތަކަށް ހުރަސް އަޅައި މުޒާހަރާތައް ރޫޅާލާފައިވާ މިންވަރާއި މިހާރު ރުޅާލާ މިންވަރާ ބޮޑު ތަނުން ތަފާތު ވާނެ ކަމަށް ޢިމްރާން ވިދާޅުވިއެވެ.
ސިޔާސީ ގޮތުން އަޅުގަނޑުމެން އެއްވުމަކަށް ވަކި ގޮތަކަށް އަމަލުކުރާކަށް ނުފޫޒެއް ނުފޯރުވަން. އެބޭފުޅުން، ގާނޫނުގެ ތެރެއިން އޮޕަރޭޝަންސްތައް ހިންގުމަށް ދެވެން އޮތް އެންމެ ފުޅާ މިނެއްގައި ފުރުސަތު ދީގެން އެއްވުންތައް ކުރިއަށް ގެންދާކަން އަޅުގަނޑު ގަބޫލު ކުރަން. މިހާރުވެސް އެއްވުންތައް، ބަހެއް ފަހަރަށް އެއްވުންތަކުގެ ތެރެއިން ފަރުދުންނަށް ދިމާވާ މައްސަލަ ތަކުގައި މ، އެ ފަރުދުންނަށް ދިމާވާ ދަތިތަކާއި ހުރެ ފުލުހުން ރޫޅާ ނުލައިގެން ނުވަތަ ފިޔަވަޅު ނާޅައިގެން އެތައް ޝަކުވާއެއް އަޅުގަނޑުމެންނަށް އެންމެ ފަހުން މި ދިޔަ އެއްވުން ތަކުންވެސް އައިސްފައިވޭ.
ފުލުހުން އެއްވުން ތަކާއި މުޢާމަލާތް ކުރަމުން ދަނީ ގާނޫނުތަކަށް ބަލައިގެން އެއާއި އެއްގޮތަށް ކަމަށާ، އެކަން ކުރިއަށް ދަނީ ގާނޫނީ ހަމަ ތަކުގެ ތެރެއިން ކަމަށްވެސް ޢިމްރާން ވިދާޅުވިއެވެ.
ޢިމްރާންގެ ވާހަކައާއި ގުޅިގެން ކޮމިޝަނަރ އޮފް ޕޮލިސް މުހައްމަދު ހަމީދުވެސް ވަނީ، މި ސަރުކަާރު އައިފަހުން އެއްވުންތަކަށް ވަރަށް ފުޅާ ދާއިރާއެއްގައި މާލޭއާއި އަތޮޅު ތެރޭގައި ފުރުސަތު ދެއްވަމުންދާ ކަމަށް ވިދާޅުވެފައެވެ. އެގޮތުން އެފަދަ ކަންކަން ރާވާ ފަރާތްތައް އެކަން ފުލުހުންނަށް އެންގުމުން އެމީހުންނަށް ފުލުހުންގެ ފަރާތުން ރައްކާތެރިކަންވެސް ފޯރުކޮށްދެއްވަމުންދާ ކަމަށް އޭނާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
