ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވެރިކަން ކުރައްވަމުންދާ ގޮތަށް، އަވައްޓެރި ގައުމުތަކުން ޖޯކުޖަހާ މަލާމާތްކުރަން ފަށައިފިކަމަށް ކުރީގެ ނައިބުރައީސް ޑރ މުހައްމަދު ޖަމީލު އަހުމަދު ވިދާޅުވެއްޖެއެވެ. 

ޑރ ޖަމީލު މިފަދައިން ވިދާޅުވެފައިވަނީ ރައީސް ސޯލިހުއަށް ދެވަނަ ދައުރެއް ދޭންޖެހޭކަމަށް ވިދާޅުވެ ފޮރިން މިނިސްޓަރު ޝާހިދު ދެއްކެވި ވާހަކަތަކަށް ރައްދުދެއްވާ ކުރެއްވި ޓްވީޓެއްގައެވެ. 

އެގޮތުން ޑރ ޖަމީލު ވިދާޅުވީ ރައީސް ސޯލިހުއަށް ދެވަނަ ދައުރެއް ދޭން ޖެހޭކަމަށް ފޮރިން މިނިސްޓަރު ޝާހިދު ވިދާޅުވި ނަމަވެސް ރައްޔިތުން ތިބީ ރައީސް ސޯލިހުގެ ވެރިކަން ނިންމަން ކެތްމަދުވެފައި ކަމަށެވެ. 

Advertisement

މިވެރިކަމުގައި ގައުމުގެ ހުރުމަތް ކަނޑާލައިފިކަމަށާއި، ގައުމުގެ މައްޗަށް އަމިއްލަ ބާރެއް މިހާރު ނުހިނގާކަމަށް ޑރ ޖަމީލު ވިދާޅުވިއެވެ. އޭގެ އިތުރުން ރައީސް ސޯލިހު ވެރިކަން ކުރައްވަމުންދާ ގޮތުން އަވައްޓެރި ގައުމުތަކުން މަލާމާތް ކުރަމުންދާކަމަށް ޑރ ޖަމީލު ވިދާޅުވިއެވެ. 

ޑރ ޖަމީލުގެ އެ ޓްވީޓުގައި ވަނީ ޝާހިދުއަށް ފާޑުކިޔުންތައް އަމާޒުކުރައްވާފައެވެ. 

ޑރ ޖަމީލު ޝާހިދު ސިފަކުރައްވާފައިވަނީ މި ވެރިކަމުގެ އަނދިރިއަދިރިންގެ ގޮތަށެވެ. ޝާހިދު މުސާރަ ނަންގަވައިގެން އެއްވެސް ޚިދުމަތެއް ނުކުރައްވާކަމަށް ޑރ ޖަމީލު ވިދާޅުވިއެވެ. 

ރައީސް ސޯލިހުގެ ވެރިކަމަށް ޑރ ޖަމީލު ފާޑުވިދާޅުވެފައިވާއިރު، ސަރުކާރަށް ނިސްބަތްވާ ބައެއް އެމްޑީޕީ މަޖިލިސް މެމްބަރުންވެސް ގެންދަވަނީ ރައީސް ސޯލިހަށް ދެވަނަ ދައުރެއް ދޭން ޖެހޭ އެއްވެސް ސަބަބެއް ނެތްކަމަށް ވިދާޅުވެ ވަކާލާތު ކުރައްވަމުންނެވެ.