ބައިނަލްއަގުވާމީ ދުވަސް ނުފުރާ އުފަންވާ ކުދިންގެ ދުވަހާއި ގުޅިގެން އައި.ޖީ.އެމް.އެޗުގެ ކުޑަކުދިންގެ ޚާއްސަ ޑިޕާޓްމަންޓާއި އަންހެނުންގެ ޚާއްސަ ޑިޕާޓްމަންޓް ގުޅިގެން ގިނަ ހަރަކާތްތައް ހިންގުމަށް ހަމަޖެހިއްޖެއެވެ. 

އައިޖީއެމްއެޗް އިން ބުނީ މި ދުވަހާއި ގުޅިގެން، މިރޭ އައި.ޖީ.އެމް.އެޗުގައި ދުވަސް ނުފުރާ ވިހާ ކުދިންގެ ބެލެނިވެރިންނަށް ބާއްވާ ބައްދަލުވުމެއް ބޭއްވުމަށް ހަމަޖެހިފައިވާ ކަމަށާ، އަދި މާދަމާ ސޯޝަލްސެންޓަރުގައި އާއިލީ ހަވީރެއް ބޭއްވުމަށްވެސް ހަމަޖެހިފައިވާ ކަމަށެވެ. 

ތަފާސްހިސާބުތަކަށް ބަލާއިރު، 2021 ވަނަ އަހަރު އެން.އައި.ސީ.ޔޫގައި އެޑްމިޓްކުރެވުނު ކުދިންގެ އަދަދަކީ 633 އެވެ. އޭގެތެރެއިން %36 ކުދިންނަކީ ދުވަސްނުފުރާ އުފަންވި ކުދިންނެވެ. ކުރިއަރާފައިވާ ގައުމުތަކާ އަޅާބަލާއިރު އައި.ޖީ.އެމް.އެޗްގެ އެން.އައި.ސީ.ޔޫގައި ދުވަސް ނުފުރާ އުފަންވާ ކުޑަކުދިންގެ ފުރާނަ ސަލާމަތްކުރެވޭ ނިސްބަތް ރަނގަޅުކަން ފާހަގަކުރަމެވެ. 2021 ވަނަ އަހަރަށް ބަލާއިރު 28 ހަފްތާއާއި 32 ހަފްތާއާއި ދެމެދު އުފަންވާ ކުދިން ސަލާމަތްކުރެވުނު ރޭޓަކީ %86 އެވެ. އަދި 32 ހަފްތާއާއި 36 ހަފްތާއާއި ދެމެދު އުފަންވާ ކުދިން ސަލާމަތްކުރެވުނު ރޭޓަކީ %98 އެވެ. 2021 ވަނަ އަހަރު ފުރާނަ ސަލާމަތްކުރެވުނު އެންމެ ޅަކުއްޖަކީ 24 ހަފްތާގައި އުފަންވެފައިވާ ކުއްޖެކެވެ.

2021 ވަނަ އަހަރު އާސަންދަ މެދުވެރިކޮށް ރާއްޖެއިން ބޭރަށް 16 ކުއްޖަކު އިތުރު ފަރުވާއަށް ފޮނުވާފައިވެއެވެ. މީގެ ތެރެއިން 5 ކުދިންނަކީ އުފަންވިއިރު ހިތުގެ އައިބުތައް ހުރުމުން ހިތުގެ ޚާއްސަ ފަރުވާތަކަށް ރާއްޖެއިންބޭރަށް ފޮނުވުނު ކުދިންނެވެ. 7 ކުދިންނަކީ ޖެނެޓިކް އަދި މެޓަބޮލިޒަމް މައްސަލަތަކަށް އިތުރު ފަރުވާއަށް ބޭރަށް ފޮނުވުނު ކުދިންނެވެ. އަދި 4 ކުދިންނަކީ ގޮހޮރުގެ އޮޕަރޭޝަންތަކަށް ފޮނުވުނު ކުދިންނެވެ. 

ކުޑަކުދިންގެ ޚާއްސަ ޑިޕާޓްމަންޓުގެ ދަށުން ހިންގާ އެން.އައި.ސީ.ޔޫގައި 2021 ވަނަ އަހަރުގައި ކުޑަކުދިންގެ ބަލިތަކުގެ ޚާއްސަ 11 ޑޮކްޓަރުންނާއި 14 މެޑިކަލް އޮފިސަރުން އަދި 34 ނަރުހުން ވަނީ މަސައްކަތް ކުރައްވާފައެވެ.

ކުރިއަށްއޮތްތަނުގައިވެސް ދުވަސްނުފުރާ އުފަންވާކުދިންގެ ފުރާނަަ ސަލާމަތްކުރުމަށާ އެކުދިންނާއި، އެކުދިންގެ ޢާއިލާތަކަށް އަދަށްވުރެ ފަހި މާދަމާއެއް ގެނެސްދިނުމަށް މި ހޮސްޕިޓަލުން ގިނަ މަސައްކަތްތަކެއް ދަނީ ކުރެވެމުންނެވެ. އެގޮތުން ނިއޯނޭޓޮލޮޖިސްޓުންގެ ޚިދުމަތް ތައާރަފު ކުރެވުމުން މުވައްޒަފުންނާ ތަފާތުވަސީލަތްތައް އިތުރަށް ހަރުދަނާ ކުރެވިގެންދާނެ ކަމަށް އައިޖީއެމްއެޗް އިން ބުނެއެވެ. 

ބައިނަލްއަޤްވާމީ ދުވަސް ނުފުރާ އުފަންވާ ކުދިންގެ ދުވަހަކީ ކޮންމެ އަހަރެއްގެ ނޮވެމްބަރު މަހުގެ 17 ވަނަ ދުވަހެވެ. ދުވަސް ނުފުރާ ވިހާ ކުދިންކަމަށް ބަލަނީ 37 ހަފްތާނުވެ އުފަންވާ ކުދިންނެވެ. އެކުދިންނަށް ރަނގަޅު ފަރުވާތަކެއްދިނުމަށް އައި.ޖީ.އެމް.އެޗްގެ ނިއޯނޭޓަލް އިންޓެންސިވް ކެއަރ ޔުނިޓް (އެން.އައި.ސީ.ޔޫ) އާއި އެހެނިހެން ތަފާތު ޑިޕާޓުމަންޓްތަކުންދަނީ ގިނަ މަސައްކަތްތަކެއް ކުރަމުންނެވެ.