ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރަށް ހަތަރު އަހަރު ވެގެން ދިޔަ އިރު އަދިވެސް ތިލަމާލެ ބްރިޖު ފެންނަން ނެތް ކަމަށް ވިދާޅުވެ ޕީޕީއެމްގެ ނައިބު ރައީސް އަދި ރައްޔިތުން މަޖިލީހުގެ ނައިފަރު ދާއިރާގެ މެންބަރު އަހްމަދު ޝިޔާމް ސަރުކާރަށް ފާޑުވިދާޅުވެއްޖެއެވެ.
ރޭ ސަންގު ޓީވީ ބޭއްވި ޕްރޮގްރާމެއްގައި ވާހަކަ ދައްކަވަމުން ޝިޔާމް ވިދާޅުވީ، ރައީސް ޔާމީންގެ ޒައާމަތުގައި ގެންނެވީ އަތްލެވޭ ތަރައްގީކަމަށާއި އެމަނިކުފާނުގެ ތަރައްގީގެ މަޝްރޫއުތައް ހުރީ ފެންނަންކަމަށެވެ. ނަމަވެސް މިސަރުކާރުން 650 މިލިއަން ޑޮލަރު ހޭދަކޮށްގެން އިންޑިއާގެ އެފްކޮންސް ކުންފުންޏާއި ހަވާލު ކޮށްގެން އަޅަން ތައްޔާރުވަމުންދާ ތިލަމާލެ ބްރިޖުން އަދިކިރިޔާ ފެނުނީ އެންމެ ދަގަނޑެއްކަމަށްވެސް އޭނާ ވިދާޅުވިއެވެ.
"ރައީސް ޔާމީންގެ ޒައާމަތުގައި އެ އޮތީ ބްރިޖެއް އަޅާފައި، އެ ބްރިޖު އަޅަން ވެގެން އެންމެ ފުރަތަމަ ޓެމްޕޮރަރީ ޕްލެޓްފޯމެއް އެޅީ، އަޅުގަނޑު ހިތަށް އަރަނީ އެވަރުގެ ޕްލެޓްފޯމުގަނޑެއްނަމަވެސް މިތަނުގައި އަޅައިލަންވީ ނޫންހޭ، ބްރިޖޭ ކިޔާފަ. ނުފެނިގެން އަދި މި އުޅެނީ" ޝިޔާމް ވިދާޅުވިއެވެ.
މިއާއެކު ޝިޔާމް ވިދާޅުވީ، ޕްލެޓްފޯމް ބާޖު އިރުކޮޅުކޮޅާ ވިލިނގިލި ފަރަށް ލައްގަމުންދާއިރު، އެ ބްރިޖު އަޅާ ނިމޭއިރު ވިލިނގިލިވެސް އޮންނާނެހެން ހީނުވާކަމަށެވެ.
މީގެއިތުރުން ޝިޔާމް ވިދާޅުވީ ސަރުކާރުގެ ހަތަރު އަހަރު ނިމިގެން ދިޔައިރު، ތަކެތީގެ އަގުތައް އިންތިހާއަށް އުފުލި، ރައްޔިތުންގެ ދިރިއުޅުމުގެ ހަރަދުތައް ބޮޑުވެއްޖެކަމަށާއި މިސަރުކާރުން ބޯހިޔާވަހިކަމަށް ކުރެވުނު އެއްވެސް މަސައްކަތެއްވެސް ނެތްކަމަށެވެ.
"އާއްމު ރައްޔިތަކަށް ވަޒީފާ އަދާކޮށްގެން ލިބޭ އާމްދަނީ އިތުރެއް ނުވޭ، ރައްޔިތުން ދަރަނިވެރިވޭ އެބަ، ކަންމަތީ ފިހާރަތަކަށް ރައްޔިތުން މިތިބީ ދަރާ، ބޭންކުގައި ލުއި ލޯނެއް އޮތަސް މިތިބީ ދަރާ" ޝިޔާމް ވިދާޅުވިއެވެ.
މިފަދަ ސަބަބުތަކާއި ހުރެ، މި ސަރުކަާރު ވެގެން ގޮސްފައި މިވަނީ ރައްޔިތުންނަށް ވަރަށް ތަކުލީފު ޖެއްސި ހަތަރު އަހަރަށް ކަމަށްވެސް އޭނާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
