މިއަދު 'ވޮއިސް' ގެ ބަދިގެއިން މި ގެނެސްދެނީ ބާބަކިޔު ޗިކަން ތައްޔާރު ކުރާނެ ގޮތެވެ. މިއީ ފިރިމީހާ ލައްވާވެސް ތައްޔާރު ކުރެވޭނެހާ ފަސޭހަ ޑިޝްއެކެވެ. މި ޑިޝް ޗިކަން ޑިޕިންގ އާއި އެކު ނުވަތަ ފަރާޓާ ނޫނީ ބަތާއި އެކު ކާލަންވެސް ވަރަށް މީރު ވާނެއެވެ. 

1 ކުކުޅު ބޮޑެތިކޮށް ކޮށްފައި

1 މޭޒުމަތީ ސަމުސާ މަސްޓަޑް ކްރީމް

1 މޭޒުމަތީ ސަމުސާ މާމުއި

1 މޭޒުމަތީ ސަމުސާ ސޯޔާ ސޯސް

2 މޭޒުމަތީ ސަމުސާ ފްރައިޑް ޗިކަން ސޯސް

½ ޖޯޑު ލޮނުމިރުސް
4 ސައިސަމުސާ ޓޮމާޓޯ ޕޭސްޓް

1 މޭޒު މަތީ ސަމުސާ ވިނިގަރ

1/2 ސައި ސަމުސާ ލޮނު (ބޭނުން ވަރަކަށް)

ހުރިހާ ބާވަތް އެއްކޮށް ރަނގަޅަށް ގިރާލާށެވެ. ދެން ކުކުޅުމަސް ތަކުގައި އެ ޕޭސްޓު ގަނޑު ރަނގަޅަށް ހާކާފައި 1 ގަޑިއިރު ވަންދެން ފްރިޖްގައި ބަހައްޓައި މެރިނޭޓް ކުރާށެވެ. ދެން 180 ޑިގްރީސް ސެލްސިއަސްއަށް 10 މިނެޓް ވަންދެން އަވަން ޕްރީ ހީޓް ކުރާށެވެ. އެއަށްފަހު ޓްރޭގައި ރަނގަޅަ ތެޔޮ އުނގުޅުމަށްފަހު ކުކުޅު ކޮޅު ރީތިކޮށް އަތުރާލުމަށްފަހު ޓްރޭ އަވަނަށް ލައި ކުކުޅު ފިހެންލާށެވެ. ގާތް ގަނޑަކަށް 30 މިނެޓް ފިހެވުމުން ކުކުޅު މެރިނޭޓް ކުރި ތަށީގައި ހުރި އިތުރުވެފައި ހުރި ޕެސްޓް ކޮޅު ކުކުޅު މަތީގައި އުނގުޅާލުމަށްފަހު ރޯ ފިލަންދެން އަނެއްކާވެސް ފިހެލާށެވެ.