އަހަރަކަށްވުރެ ގިނަ ދުވަހު ބްލޮކް ކޮށްލާފައި އިނުމަށްފަހު އެެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ޓުވިޓަރ އެކައުންޓު، ޓުވިޓަރ އިން އޭނާއަށް އަނބުރާ ދީފިއެވެ.
އެމެރިކާގެ އެންމެ ފަހުން އޮތް ރިޔާސީ އިންތިހާބުގައި ޓްރަމްޕްއަށް ނާކާމިޔާބީއާއި ކުރިމަތިލާންޖެހުމުން އެ އިންތިހާބުގެ ސައްހަކަމާއި މެދު ސުވާލު އުފައްދައި، ޓްރަމްޕް އިސްވެ ހުރެ އެމެރިކާގެ ޤާނޫނު ހަދާ މަޖިލީސް ކުރާގެއަށް އޭނާގެ ސަޕޯޓަރުން އެއްވާން ގޮވާލުމާއި ގުޅިގެން މިދިޔަ އަހަރުގެ ޖަނަވަރީ މަހުގެ ތެރޭގައި އޭނާގެ ފޭސްބުކް އަދި ޓުވިޓަރ އެކައުންޓް ވަނީ ބްލޮކް ކޮށްލާފައެވެ.
އެހެންނަމަވެސް، ދާދިފަހުން 44 ބިލިއަން ޑޮލަރަށް ޓުވިޓަރ ގަތް، އެމެރިކާގެ މަހުޖަނު އީލަން މަސްކު އިއްޔެ ވަނީ އަލުން ޓްރަމްޕް ޓުވިޓަރއަށް ގެންނަން ފެނޭތޯ ޕޯލްއެއް ނަގާފައެވެ. އެގޮތުން އެ ޕޯލްގައި ބައިވެރިވި 52 އިންސައްތަ މީހުން ވޯޓު ދިނީ ޓްރަމްޕް އަނބުރާ ގެނައުމަށެވެ.
"ރައްޔިތުން ނިންމުން ނިންމައިފި. ޓްރަމްޕް އަލުން އެނބުރި ގެންނާނަން" އީލަން މަސްކު ޓްރަމްޕް އަށް ޓުވިޓާ އެކައުންޓް އަނބުރާ ދިނުމަށް ނިންމިކަން އިއުލާންކޮށް ބުނެފައި ވެއެވެ.
ޓްރަމްޕް އަށް އަލުން އެކައުންޓް ލިބިފައި މިވަނީ އަންނަ އަހަރު އެމެރިކާގައި ބާއްވާ ރިޔާސީ އިންތިހާބުގައި ވާދަކުރާނެ ކަމަށް އޭނާ އިއުލާން ކޮށްފައިވަނިކޮށެވެ. ވުމާއެކު އެކައުންޓު ލިބުން ވެގެންދާނީ އެ އިންތިހާބުގެ ކެމްޕެއިން ކުރުމަށް އޭނާއަށް ލިބުނު ބޮޑު ކާމިޔާބީއެއް ކަމަށް އެގައުމުގެ ސިޔާސީ ތަޖުރިބާކާރުން ބުނެއެވެ. އެހެންނަމަވެސް، އަދި މިހާތަނަށް ޓްރަމްޕްގެ އެކައުންޓުން އޭނާ ޓުވީޓުކޮށްފައިނުވެއެވެ.
މަސްކު ޓުވީޓާ ގަތުމަށް ފަހުގައި އޭނާ ވަނީ، އެ ޕްލެޓްފޯމް ގައި ޚިޔާލު ފާޅުކުރުމުގެ މިނިވަންކަން ފުރިހަމައަށް ދޭނެކަން އަންގާފައެވެ. އެއާއެކު އޭނާ ޓްރަމްޕް އަށް އެކައުންޓް އަލުން ދޭނެ ކަމަށް ގިނަ ބޭރުގެ މީޑިއާތަކުން ވަނީ ޚަބަރުފަތުރާފައެވެ. ޓްރަމްޕްގެ އިތުރުންވެސް ކުރިން އެގޮތަށް ބްލޮކްކޮށްފައި ހުރި ބައެއް ފަރާތްތަކުގެ އެކައުންޓް މަސްކުވަނީ އަލުން ދީފައެވެ.
Advertisement
This content is created and paid for by advertisers and does not involve Voice Journalists
