މި މަހުގެ 10 ވަނަ ދުވަހުގެރޭ މ.ނިރުފެހިގޭގައި ހިނގި އަލިފާނުގެ ހާދިސާއަށްފަހު ޢިމާރާތް ސާފުކުރަމުންދަނިކޮށް ފެނުނު ފައިތިލައިގެ ޑީއެންއޭ ސާމްޕަލް ނަގައި އެއީ ކާކުގެ ފައިތިލައެއްތޯ ބެލުމަށް ތަހުލީލު ކުރަމުންދާ ކަމަށް ފުލުހުން ބުނެފިއެވެ. 

ނިރުފެހި ގޭގައި ހިނގި އަލިފާނުގެ ހާދިސާގައި ޖުމުލަ 10 މީހުން ނިޔާވެފައިވާއިރު އޭގެ ތެރެއިން ބައެއް މީހުން ވަރަށް ބޮޑަށް ފިހިފައިވާ ކަމަށް ފުލުހުން ބުނެފައިވެއެވެ. އަދި އެމީހުންނާއި ބެހޭ މައުލޫމާތު ހޯދައި ކޮންބައެއްކަން ދެނެގަންނަން އުނދަގޫ ވީ ވެސް އެމީހުން ވަރަށް ބޮޑަށް ފިހިފައިވާތީ ކަމަށް މީގެ ކުރިން ފުލުހުން ބުނެފައިވެއެވެ.

އެގޮތުން، އެރޭގެ ހާދިސާގައި ނިޔާވި ދިހަ ވަނަ މީހާގެ ގޮތްވެސް ދެނެ ގަނެވިފައިވާ ކަން ފުލުހުން ހާމަކުރީ މިމަހު 13 ވަނަ ދުވަހުއެވެ. 

އެއަށްފަހު އެތަން ސާފުކޮށް ކުނިތައް ނެގުމުގެ މަސައްކަތް ކުރަމުންދަނިކޮށް, އެ މަސައްކަތުގެ ތެރެއިން އެގެއިން މީހެއްގެ ފައިތިލަ ފެނިފައިވާ ކަމަށް ފުލުހުން ބުނެފައިވެއެވެ. 

އަދި އެކަމާއި ގުޅިގެން މިއަދު ވޮއިސް އިން ކުރި ސުވާލަކަށް ޖަވާބު ދެއްވަމުން ފުލުހުންގެ މީޑިއާ އޮފިޝަލް ވިދާޅުވީ، އަލިފާނުގެ ހާދިސާގައި ނިޔާވި މީހުންނާއި ފަހުން ފެނުނު ފައިތިލައިގެ ޑީއެންއޭ ސާމްޕަލް ނަގައި ތަހުލީލު ކުރުމުގެ މަސައްކަތް ކުރަމުންދާ ކަމަށެވެ.

ނިރުފެހިގޭ ހިނގި އަލިފާނުގެ ހާދިސާގައި ނިޔާވި 10 މީހުންގެ ތެރޭގައި އިންޑިއާއަށް ނިސްބަތްވާ 3 އަންހެނުންނާއި 5 ފިރިހެނުން ހިމެނެއެވެ. އަދި ބަންގްލަދޭޝް އަށް ނިސްބަތްވާ 1 އަންހެނަކާއި 1 ފިރިހެނެއް ހިމެނޭ ކަމަށްވެސް ފުލުހުން ބުނެފައިވެއެވެ.