ހުޅުމާލޭ ހުންނަ ރެހެންދި ސުކޫލުގައި ކުރިއަށްގެންދިޔަ ކެޑޭޓު ހަރަކާތެއްގެ ތެރެއިން އެ ސުކޫލުގެ އަންހެން ދަރިވަރުންގެ ހެދުން ބާލުވައި އެ ކުދިން ގަޔަށް ޕްރެޝަރުގައި ފެންޖެހި މައްސަލައެއް ފެންމަތިވެއްޖެއެވެ.

މިކަމާއި ގުޅިގެން 'ވޮއިސް' އަށް މައުލޫމާތު ދެމުން އެތަނުން ދަރިވަރެއްގެ ބެލެނިވެރިއަކު ބުނީ، މި މަހުގެ 10، 11، އަދި 12 ވަނަ ދުވަހު އެ ސުކޫލުގައި ބޭއްވި މި ހަރަކާތުގައި ބައިވެރިވި ގުރޭޑު 8، 9، އަދި 10 ގެ އަންހެން ކުދިންތަކެއް، އަންހެން ފާޚާނާ ބަރި ކައިރިއަށް އެއްކޮށް އެ ކުދިން ލައިގެން ތިބި ހެނދުންތައް ބޭލުމަށް އަންހެން އިންސްޓްރަކްޓަރެއް އަމުރު ކޮށްފައިވާކަމަށެވެ. އަދި އެފަދައިން ކަން ކުރަން ދެކޮޅު ހެދި ކުދިންނާ ދިމާއަށް ބާރަށް ހަޅޭލަވައި އެކަން ކުރަން އެކުދިންނަށް އެ އިންސްޓްރަކްޓަރ މަޖުބޫރުކުރި ކަމަށްވެސް ބެލެނިވެރިޔާ ބުންޏެވެ. 

އަދި އެ ކުދިން ހެދުމުގެ އެތެރެއިން ލައިގެން ތިބި އަންޑަރ ގާމެންޓްސް ފިޔަވައި އެހެން ހުރިހާ އެއްޗެއް ބާލުވައި، ބާރު ޕްރެޝަރުގައި އެކުދިންގަޔަށް އެ އިންސްޓްރަކްޓަރ ފެން ޖަހާފައިވާއިރު، އޭގެ ސަބަބުން ގިނަ ކުދިންނަށްވަނީ ނަފްސާނީ ގޮތުންވެސް އަސަރު ކޮށްފައިވާކަން ބެކެނިވެރިޔާ ފާހަގަކޮށްފައިވެއެވެ. 

Advertisement

މީގެ އިތުރުން އެވަގުތު އެ ސަރަހައްދުގައި އެއްވެސް ފިރިހެން ކުއްޖެއް ނެތް ނަމަވެސް، އަންހެން ކުދިންތަކެއްވެސް، އެކުދިންގެ ހެދުން ބާލުވައި، އައުރަ ކަޝްފުކޮށް، އެ ހިންގި އަމަލު ތަކުގެ ސަބަބުން ކުދިން ތިބީ އިންތިހާއަށް ބިރުގަނެ ލަދުވެސް ގަނެފައި ކަމަށާ، އެއީ ކުދިންނަށް ދިން ޖިންސީ ގޯނާއެއް ކަމަށްވެސް އެ ސުކޫލު ބެލެނިވެރިޔާ ވަނީ ބުނެފައެވެ. 

އެ މައްސަލަ މިހާރު ސުކޫލުގެ ސަމާލުކަމަށް ބެލެނިވެރިން ގެނެސްފައިވާއިރު އެކަން ބަލާނެކަމަށް ސުކޫލުން ބުނެފައިވާކަމަށްވެސް މައުލޫމާތު ލިބެއެވެ. 

މި ކަމާއި ގުޅިގެން އެޑިއުކޭޝަން މިނިސްޓްރީގެ ބަހެއް ލިބޭތޯ މެސެޖުކޮށް ގުޅައިގެންވެސް މިނިސްޓްރީން ޖަވާބު ނުދެއްވާތީ މިނިސްޓްރީގެ ބަހެއް ލިބޭގޮތެއް ނުވިއެވެ.