ފީފާ ވޯލްޑްކަޕް 2022 ގައި ސެނެގާލް އާއި ދެކޮޅަށް މެޗުގެ ފަހު ހާފުގައި ކާމިޔާބުކުރި ލަނޑުތަކާއެކު ނެދަލޭންޑްސް އިން މުބާރާތުން ފެށުން ރަނގަޅުކޮށްފި އެވެ. 

ގަތަރުގެ އަލް ތުމާމާ ސްޓޭޑިއަމުގައި ކުޅުނު ގްރޫޕް އޭ ގެ މި މެޗު ނެދަލޭންޑްސް ކާމިޔާބުކޮށްފައިވަނީ 2-0 ގެ ނަތީޖާއަކުންނެވެ. 

މެޗުގެ ފުރަތަމަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ވަނީ ފެނިގެންގޮސްފައެވެ. އެގޮތުން ނެދަލެންޑްސްގެ ފްރެންކީ ޑި ޔޮންއަށް ވަނީ ލަނޑު ޖަހަން ރަނުގެ ދެ ފުރުސަތު ލިބި ބޭކާރުވެފައިވާއިރު ސެނެގާލް އަށް ވެސް ރަނގަޅު ފުރުސަތެއް ލިބުނެވެ. 

Advertisement

ފުރަތަމަ ހާފުގައި ދެ ޓީމުން ކުރެ ޓީމަކަށް ލަނޑެއް ކާމިޔާބުނުކުރެވުނު ނަމަވެސް ދެވަނަ ހާފުގައި ދެ ޓީމުގެ ކުޅުމަށް ވެސް ބަދަލުތަކެއް އައިސްފައިވެއެވެ. މި ހާފުގައި ލިބުނު ފުރުސަތުތަކަށް ބަލާއިރު ރަނގަޅު ފުރުސަތުތަކެއް ލިބި ވަނީ ބޭކާރުވެފައެވެ. ހާއްސަކޮށް ސެނެގާލްގެ އިސްމާއީލާ ސާ އަށް ލިބުނު ފުރުސަތު ފާހަގަކޮށްލެވެއެވެ. 

މެޗުގެ ފަހު ދިހަ މިނެޓުގެ ތެރޭގައި ނެދަލޭންޑްސްގެ ދެ ލަނޑު ފެނިގެންދިޔައިރު ފުރަތަމަ ލަނޑު 84 ވަނަ މިނެޓުގައި ޑި ޔޯން ގެ އެހީތެރިކަމާއެކު ނެދަލަންޑްސް އަށް ޖަހައިދިނީ ކޯޑީ ގަކްޕޯ އެވެ.

ނެދަލޭންޑްސް ގެ ދެވަނަ ލަނޑު ފެނިގެންދިޔައީ މެޗުގެ ފަހުކޮޅުގައެވެ. މި ލަނޑު އެ ޓީމަށް ކާމިޔާބުކޮށްދިނީ ޑެވި ކްލާސަން އެވެ.

މި މެޗާއެކު ގްރޫޕް އޭ ގައި ހިމެނޭ ހަތަރު ޓީމުވެސް ވަނީ މެޗެއް ކުޅެފައެވެ.