ކުރީގެ އަނބިމީހާގެ ގެޔަށް ގަދަކަމުން ވަދެ، ދަރިންގެ ކުރިމަތީގައި އޭނާއަށް ޖިސްމާނީ ގޮތުން އަނިޔާކުރި މީހަކު، ނުވަ މަހަށް ޖަލަށްލާން ކްރިމިނަލް ކޯޓުން އިއްޔެ ހުކުމްކޮށްފިއެވެ.

2018 ވަނަ އަހަރުގެ ޖޫން މަހު ހިނގި އެ ހާދިސާ އާއި ގުޅިގެން ދ. އަތޮޅަށް ނިސްބަތްވާ އެ މީހާގެ މައްޗަށް ދައުލަތުން ތިން ދައުވާއެއް ކޮށްފައިވެއެވެ. އެއީ މުދަލަށް ގެއްލުން ދިނުމުގެ ދައުވާ އާއި އަނިޔާ ކުރުމުގެ ދައުވާގެ އިތުރުން އެނގި ހުރެ ހުއްދަ ނޫން ތަނަކަށް ވަނުމުގެ ދައުވާ އެވެ. މި ތިން ދައުވާ އަށްވެސް އޭނާ ވަނީ އިންކާރުކޮށްފައެވެ. 

އެ މީހާގެ މައްޗަށް ދައުލަތުން ކުރި ދައުވާގައި ބުނީ، އެ ފިރިހެން މީހާ ވަނީ އޭނާގެ ކުރީގެ އަނބިމީހާގެ ގޭގޭ ދޮރު ހަލާކުކޮށްލައިގެން އެގެއަށްވަދެ، އޭނާގެ ބޮލުގަޔާއި ތަންތާގައި ތަޅާ، އަނިޔާކޮށްފައި ކަމަށެވެ. އަދި އެ ހުރިހާ އަނިޔާއެއް ކޮށްފައިވަނީ ދެ މީހުންނަށް ލިބިފައިތިބި ދަރިންގެ ވެސް ކުރިމަތީގައި ކަމަށްވެސް ދައުވާގެ ތަފްސީލް ގައި ބުނެފައި ވެއެވެ. 

Advertisement

ދައުލަތުން ފިރިހެން މީހާގެ މައްޗަށް ކުރި ދައުވާއަށް އިންކާރުކޮށް އޭނާ ކޯޓުގައި ބުނެފައިވަނީ ކުރީގެ އަނބިމީހާއަށް ހަމަލާދީފައިވަނީ އޭނާ އިސްވެ އަނިޔާކުރަން ފެށުމުން ނަފްސުގެ ދިފާއުގައި ކަމަށެވެ. އަދި، އެއީ އޭނާ ކުލިދައްކާ ތަނެއް ކަމަށާއި އެހެންކަމުން ކޮންމެ ވަގުތެއްގައި ވެސް އެގެއަށް ވަތުމުގެ ހުއްދަ، އޭނާއަށް އޮންނާނެ ކަމަށް ވެސް އޭނާ ވަނީ ބުނެފައެވެ.

ނަމަވެސް، ޝަރީއަތުން ވަނީ، ގެއެއްގެ ދޮރު ހަލާކުކޮށްލައިގެން ވަދެ، އަނިޔާކުރީ ނަފްސުގެ ދިފާއުގައި ކަމަށް ގަބޫލުކުރެވޭނެ އެއްވެސް ހަމައެއް ނެތް ކަމަށާއި، ކުލި ދެއްކިޔަސް، އެތަނެއްގައި ދިރިއުޅޭ މީހުންގެ ހުއްދައާއި ނުލާ އެއްވެސް ތާކަށް ނުވަދެވޭނެކަން ފާހަގަކޮށްފައެވެ.

އަދި އެ މައްސަލަ އާއި ގުޅިގެން ދައުލަތުން ހެއްކެއްގެ ގޮތުގައި ހުށަހެޅި ފުލުސް އޮފިސަރުންގެ ފަރާތުންވެސް، އެ މީހާ ގެއަށް ވަދެފައި ވަނީ ތަޅު ހަލާކު ކޮށްލައިގެން ކަމަށާ، އެ ހާދިސާ ހިނގި ކުށުގެ ވެއްޓަށް ފުލުހުން ދިޔަ އިރުވެސް އޭނާ ހުރި ކަމަށް ބުނެފައި ވެއެވެ. އަދި އެ ނޫންވެސް އިތުރު ހެކި ތަކެއް އެ ފިރިހެން މީހާއާއި ދެކޮޅަށް ދައުލަތުން ވަނީ ހުށަހަޅާފައެވެ. 

އެހެންކަމުން އެ ހުރިހާ ކަމަކަށް ރިއާޔަތް ކޮށް ފިރިހެން މީހާގެ މައްޗަށް ކުށް ސާބިތުވާކަމަށް ކޯޓުން ވަނީ ނިންމާފައެވެ. ފިރިހެންމީހާގެ މައްޗަށް ތިން ދައުވާވެސް ސާބިތުވާކަން ޝަރީއަތުން ނިންމުމާއޮ ގުޅިގެން އޭނާ ވަނީ ކުށުގެ އަދަބު ލުއިކޮށް ޖޫރިމަނާއަށް ބަދަލުކުރުމަށް އެދިފައެވެ  އެހެންނަމަވެސް، ކްރިމިނަލް ކޯޓުގައި މި މައްސަލަ ބެއްލެވި، ގާޒީ އަލީ ނަދީމް ނިންމެވީ ޖޫރިމަނާގެ އަދަބަކަށް ބަދަލު ނުކުރުމަށެވެ. އަދި ކުށްކުރި ގޮތަށް ރިއާޔަތްކޮށް، އަދަބުގެ އަސާސީ މިންގަނޑަށް ވުރެ ދަރަޖަ މަތި ކުރުމަށްފަހު ތިން ދައުވާގައި އޭނާ ނުވަ މަހާއި 18 ދުވަހަށް ޖަލަށްލާން ވަނީ ހުކުމްކޮށްފައެވެ.

ސަބަބެއްގެ ގޮތުގައި ގާޒީ ފާހަގަކުރައްވާފައިވަނީ، ދަރިންގެ ކުރިމަތީ އަނިޔާކުރުމުން ކުރާ އަސަރު ބޮޑުވާނެ ކަމާއި، ގެވެށި އަނިޔާގެ މައްސަލައެއްގައި ޖޫރިމަނާގެ އަދަބެއް ކަނޑައެޅުމަކީ އެފަދަ މައްސަލަތަކުގައި ފަރުވާ ކުޑަކުރުން ކަމަށް ވާނެ ކަމެވެ.