ޖީއެސްޓީއާއި ޓީޖީއެސްޓީ ބޮޑު ކުރުމުގެ ސަބަބުން ރާއްޖޭގެ އިގްތިސާދަށް އޭގެ ނޭދެވޭ އަސަރުތަކެއް ނުކުރާނެ ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ. 

މިއުވާން މިފަދައިން ވިދާޅުވީ، ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި، ޓެކްސް ބޮޑު ކުރުމުގެ ސަބަބުން ބޮޑެތި ބައެއް ކުންފުނިތަކުން، އެ ކުންފުނިތަކަށް ގެއްލުން ވާނެ ކަމަށް ބުނެފައިވާ ކަމަށާ، ދިވެހިރާއްޖޭގެ ޓެކްސްގެ ނިޒާމަށް ގެނެވިފައިވާ ބަދަލުތައް ގެނެވިފައިވަނީ ވިޔަފާރީގެ ސިނާއަތުގައި ޝާމިލުވާ ފަރާތްތަކާއި އެކު މަޝްވަރާތަކެއް ކުރެވިފައިވޭތޯ ނޫސްވެރިއެއް ކުރި ސުވާލަށް ޖަވާބުދެއްވަމުންނެވެ.  

އެ ސުވާލަށް ޖަވާބު ދެއްވަމުން މިއުވާން ވިދާޅުވީ، ޓެކްސްގެ ނިޒާމަށް ބަދަލުތަކެއް ގެނެސްފައިވަނީ ދައުލަތުގެ ކަމާއި ގުޅޭ އިދާރާތަކާއި އަމިއްލަ ވިޔަފާރިތަކާއި އިންޑަސްޓްރީގެ އެކި ފަރާތްތަކާއި މަޝްވަރާކޮށް، ބައިނަލްއަގުވާމީ މާލީ އިދާރާތަކުގެ ލަފާޔާ އެއްގޮތަށް ކަމަށެވެ.

Advertisement

އަދި ޓެކްސް ބޮޑު ކުރުމުގެ ސަބަބުން ރާއްޖޭގެ އިގްތިސާދަށް ނޭދެވޭ އަސަރެއް ނުކުރާނެކަން ފާހަގަކުރައްވައި މިއުވާން ވިދާޅުވީ، ޓީޖީއެސްޓީ އަދި ޖީއެސްޓީ ބޮޑު ކުރެވިފައިވަނީ ސަރުކާރުން ހިންގަމުންދާ ޕްރޮޖެކްޓުތަކާއި މަޝްރޫޢޫތަކުގެ އިތުރުން ފޯރުކޮށްދެމުންދާ ހިދުމަތްތައް މެދު ނުކެނޑި  ފޯރުކޮށްދިނުމަށް ކުރެވެމުންދާ މަސައްކަތްތަކުގެ ތެރެއިންކަމަށެވެ.

"(ޓެކްސް ބޮޑު ކުރީ) ދައުލަތުގެ ކަމާ ގުޅޭ އިދާރާތަކާއި އަދި އަމިއްލަ ވިޔަފާރިތަކާއި އަދި އިންޑަސްޓްރީގެ އެކި ފަރާތްތަކާއި މަޝްވަރާ ކުރުމަށްފަހު. އަދި ހަމަ އެއާއެކު އެކު، ބައިނަލްއަގުވާމީ މާލީ އިދާރާތަކުގެވެސް ލަފަޔާއި އެކު މި ބޮޑު ކުރެވުފައި ވަނީ. މިއީ އިންޑަސްޓްރީ ގެ އިތުރުން މުޅި ރާއްޖޭގެ އިގްތިސާދު މެނޭޖު ކުރުމަށް ފިޔަވަޅުތައް އެޅިގެން މިދަނީ. ޖީއެސްޓީ ގެ ސަބަބުން އަދި ޓީޖީއެސްޓީގެ ސަބަބުން އިގްތިސާދަށް އޭގެ ނޭދެވޭ އަސަރުތަކެއް ނުވެއް ކުރާނެ." މިއުވާން ވިދާޅުވިއެވެ.