އިންޑިއާގެ އުއްތަރު ޕްރަދޭޝްގެ އަވަށެއް ކަމަށްވާ ޣާޒިއަބާދުގައި އެއްފަހަރާ އެއް ތަނެއްގައި 3003 ކައިވެނިކޮށްފިއެވެ. 

އިންޑިއާ ސަރުކާރުގެ އެހީގައި ބޭއްވި މި ބޮޑު ކައިވެނި ހަފްލާގައި 1,848 ހިންދޫ އަންހެނުންނާއި، 1,147 މުސްލިމު އަންހެނުން ކައިވެނިކޮށްފައިވާ ކަމަށް އުއްތަރު ޕްރަދޭޝްގެ އޮފިޝަލުންނާއި ހަވާލާދީ މީޑިއާ ތަކުން ރިޕޯޓް ކޮށްފައިވެއެވެ. އެގޮތުން ކައިވެނި ކުރި މީހުންގެ ތެރޭގައި ޣާޒިއަބާދާއި، ހާޕޫރާއި، ބުލަންދުޝަހަރުގެ މީހުން ހިމެނެއެވެ. 

މާސް ވެޑިން ނުވަތަ ބޮޑު ކައިވެނި ހަފްލާ ތަކަކީ، އިންޑިއާގެ އާއިލާ ތަކުގެ ތެރެއިން ދަރިންގެ ކައިވެނި ކޮށްދިނުމާއި ކައިވެނި ހަފްލާ ތައް ކުލަގަދަކޮށް ބޭއްވުމުގެ ތަނަވަސްކަން ނެތް މީހުންނަށް އެހީވުމުގެ ގޮތުން، އެ ގައުމުގެ ސަރުކާރުން އިންތިޒާމް ކޮށްގެން ބާއްވާ ހަފްލާއެކެވެ. މިގޮތުން ބާއްވާ ކައިވެނި ހަފްލާ ތަކުގައި ކެއުމާއި، ކައިވެނި ކޮށްދޭ މީހުންނާއި، ވެޑިން ކިޓް އާއި ކައިވެނި ކުރާ ތަން ޒީނަތް ކުރުންފަދަ ހުރިހާ ކަމެއްވެސް ކުރަނީ ސަރުކާރުންނެވެ. އަދި އޭގެ އިތުރުން ކޮންމެ ކަޕްލް އަކަށް ކައިވެނީގެ ހަދިޔާއެއްގެ ގޮތުން 75,000 ރުޕީސްވެސް އެ ސަރުކާރުން ވަނީ ދީފައެވެ. 

މިފަދަ ހަފްލާތައް މީގެ ކުރިންވެސް އިންޑިއާގައި ބާއްވާފައިވާއިރު، މިފަހަރުގެ ހަފްލާ ބާއްވާފައި ވަނީ ޣާޒިއަބާދުގެ ކަމަލާ ނެހުރޫ ނަގަރު ގުރައުންޑު ގައެވެ. އަދި މިފަހަރު ބޭއްވުނު ބޮޑު ކައިވެނި ހަފްލާގައި އުއްތަރު ޕްރަދޭޝްގެ ލޭބަރ މިނިސްޓަރ އަނިލް ރާޖްބާރާއި، ޣާޒިއަބާދުގެ އެމްޕީ ޖެނެރަލް ވީކޭ ސިންގާއި، ޣާޒިއަބާދުގެ އެމްއޭއެލްއޭގެ މޭޔަރާއި އެ ސަރަހައްދުގެ އެހެނިހެން އޮފިޝަލުން ވަނީ ބައިވެރިވެފައެވެ. 

އިންޑިއާގެ ސަރުކާރުން މިފަދަ ކައިވެނި ހަފްލާތައް ބޭއްވުމަކީ ކެރިފޯރުންތެރިކަން ނުުހުންނަ މީހުންނަށް ލިބޭ ވަރަށް ބޮޑު އުފަލެއް ކަމަށް، މި ހަފްލާތެރެއިން ކައިވެނި ކުރެވުނު ގިނަ މީހުން ބުނެއެވެ. 

"މި ކައިވެނި ހަފްލާގެ އެންމެ ރަނގަޅު ތަންކޮޅަކީ، ކައިވެނި ކުރާ އަންހެން ކުއްޖާގެ އާއިލާއިން ކައިވެންޏާއި ގުޅޭ އެއްވެސް އިންތިޒާމެއް ހަމަޖައްސައި، ފިރިމީހާގެ އާއިލާއަށް ދޭން ޖެހޭ ޑަވްރީ ދީ ހަދަން ނުޖެހޭކަން. އަހަރެންގެ އާއިލާގެ ނެތް މާލީ ތަނަވަސްކަމެއް. އެހެންކަމުން މިއީ އަހަރެންގެ އާއިލާއަށް ލިބުނު ވަރަށް ބޮޑު އެހީއެއް. އަހަރެންގެ އާއިލާ މީހުން އަހަރެން އިންނާނެ މީހެއް ހޯދީ. ދެން އަހަރުމެން ދެމީހުން ނިންމީ އިންނަން. ދެފަރާތުން ކުރެ އެއްވެސް ފަރާތެއްގެ އާއިލާއަށް ފައިސާ އާއި ގުޅިގެން އެއްވެސް ކަހަލަ ބުރައެއް އުފުލާކަށް ނުޖެހުނު" މި ކައިވެނި ހަފްލާގައި ބުލަންދުޝަހަރުގެ ފިރިހެނަކާއި އިން 21 އަހަރުގެ ކުސުމް އިންޑިއާ ގެ މީޑިއާ އަކަށް މައުލޫމާތު ދެމުން ބުނެފައިވެއެވެ.