މިހާރު ގަތަރުގައި ކުރިއަށްދާ ވޯލްޑްކަޕްގައި ބްރެޒިލް ފުރަތަމަ ކުޅުނު މެޗުތެރެއިން ނޭމާ ޖޫނިއަރ އަށް ލިބުނު އަނިޔާގެ ސަބަބުން ރޭ ބްރެޒިލް އާއި ސްވިޒަލޭންޑް ބައްދަލުކުރި މެޗުގައި އޭނާ ފެނިފައެއް ނުވެއެވެ. 

އެހެންނަމަވެސް، އެ މެޗުބަލަން ގޮސް ތިބި ސަޕޯޓަރުންގެ ތެރެއިން ނޭމާ އާއި ވަރަށް ވައްތަރު މީހެއް ވަނީ ފެނިފައެވެ. ނޭމާގެ ކަރުގައި އިންނަ ފަދަ ޓެޓޫ އެއް ކަރުގައިވެސް ޖަހައިގެން، ތޮތްޕަކާއި އައިނެއް އަޅައިގެން ސަޕޯޓަރުންގެ ތެރޭގައި އެ އިން މީހާ އަކީ، ނޭމާ ކަމަށް ހީކޮށް މެޗު ބަލަން ގޮސް ތިބި ވަރަށް ގިނަ ސްޕޯޓަރުން ވަނީ އޭނާ އާއި އެކު ސެލްފީވެސް ނަގާފައެވެ. 

ނޭމާ އާއި ވައްތަރު މީހާއާއި އެކު ފޮޓޯ ނަގަން ސަޕޯޓަރުން އޭނާ ވަށާލާފައި

އެގޮތުން، ފޮޓޯ ނަގަން އައި މީހުންތައް އޭނާ ވަށާލައި، ގަޔަށް އަރައި ގަންނަ ހިސާބުގައި ތިބި އިރު، މެޗުގެ ވަކި ހިސާބަކުން އޭނާ ދަނޑުން ނެރެފައިވާ ކަމަށްވެސް ބައެއް ނޫސްތަކުން ރިޕޯޓް ކޮށްފައި ވެއެވެ. އެހެންނަމަވެސް، އޭނާ ދަނޑުން ނެރުނީ ދަނޑު ތެރޭގައި މީހުން އެއްތަނަކަށް ތޮއްޖެހޭތީ ކަމެއް ނުވަތަ އެނޫން ސަބަބަކާއި ހުރެ ކަމެއް މިހާތަނަށް އެނގިފައެއް ނުވެއެވެ. 

ސަޕޯޓަރުންގެ އިތުރުން، ކުޅިވަރު ޚަބަރުތައް ގެނެސްދޭ ޓުވިޓާ ވެރިފައިޑް އެކައުންޓެއް ކަމަށްވާ "ފޮކްސް ސޮކާ" އިންވެސް ވަނީ އެއީ ނޭމާ ކަމަށް ހީކޮށް ޓުވީޓެއް ކޮށްފައެވެ. އެގޮތުން އެ ޕޭޖުން ކުރި ޓުވީޓުގައި ވަނީ، ގަތަރުގެ މަގުމަތީގައި ނޭމާ ހިނގަމުންދާ ކަމަށް ބުނެ ވީޑިއޯއެއްވެސް އާއްމު ކޮށްފައެވެ. 

އެހެންނަމަވެސް، އެއީ ނޭމާ ނޫންކަން ފަހުން ޔަގީން ވުމާއި އެކު އެ އެކައުންޓުންވަނީ، އެއީ ނޭމާ ނޫންކަން މިހާރު އެނގިއްޖެ ކަމަށާ، އެހެންނަމަވެސް ނޭމާ އާއި ވަރަށް ވައްތަރު މީހެއް ހުރިކަން މިހާރު ގަބޫލުކޮށްފައިވާ ކަމަށް ބުނެފައެވެ. 

ނޭމާ އާއި ވައްތަރު މީހަކަށް ހެދިގެން މީހުން "ފޫލް" ކުރި މި މީހާއަކީ ކާކުކަން ނޭނގުނަސް އޭއީ ނޭމާ ނޫންކަން ވަނީ މިހާރު ޔަގީންވެފައެވެ. އަދި ނޭމާ އަށް ވެގެން މީހުން ހައްދަން އޭނާ ކުރި މަސައްކަތް ކާމިޔާބު ވެފައިވާ ކަމަށް ގިނަ ބަޔަކު ދަނީ ބުނަމުންނެވެ.