އެއްވެ އުޅުމުގެ ހައްގު ހިފެހެއްޓުމަކީ އެމްޑީޕީގެ އަސާސާއި ޚިލާފަށް ޕާޓީ ހިންގަން އުޅޭކަމުގެ މިސާލެއް: ވަހީދު
އެއްވެ އުޅުމުގެ ހައްގު ހިފެހެއްޓުމަކީ އެމްޑީޕީގެ އަސާސުތަކާއި ޚިލާފަށް ޕާޓީ ހިންގަން އުޅޭކަމުގެ މިސާލެއްކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު ވިދާޅުވެއްޖެއެވެ.
އެއްވެ އުޅުމުގެ މިނިވަންކަން ހަނިކުރެވޭ ގޮތަށް ގާނޫނުގައި އޮތް އޮތުން އުވާލަން ރައްޔިތުންގެ މަޖިލީހަށް ބިލެއް ހުށަހަޅާފައިވާތީ، ގާނޫނުގެ އެ ބައި ބާތިލްކުރުމުގެ މައްސަލަ ހައި ކޯޓުން ނުބަލަން ދައުލަތުން ކޯޓުގައި ވަނީ އެދިފައެވެ.
އެކަމާއި ގުޅޭގޮތުން ކުރެއްވި ޓްވީޓެއްގައި ވަހީދު ވިދާޅުވީ އެއްވެ އުޅުމާއި އިހުތިޖާޖު ކުރުމާއި، ސުލްހަވެރި ސިޔާސީ ހަރަކާތް ހިންގުމަކީ އެމްޑީޕީގެ އެންމެ ބޮޑެތި އަސާސްތައް ކަމަށެވެ.
އެ ހައްގުތައް ހަނިކޮށްފައި އޮތުމަކީ އެމްޑީޕީގެ އަސާސްތަކާއި ޚިލާފަށް ޕާޓީ ހިންގަން އުޅޭކަމުގެ ކުޑަ މިސާލެއްކަމަށް ވަހީދު ވިދާޅުވިއެވެ.
އެއްވެ އުޅުމުގެ ގާނޫނަށް 2016 ވަނަ އަހަރު ގެނައި އިސްލާހުގައިވާ ގޮތުން މާލޭގައި ހުއްދަ ހޯދުމެއް ނެތި އެއްވެވޭނީ ސަރުކާރުން ކަނޑައަޅާ ތަންތަނުގައި އެކަންޏެވެ. ސަރުކާރުން ކަނޑައަޅާފައިވަނީ ހުއްދަ ހޯދުމެއް ނެތި އެއްވެވޭނީ މާލޭގެ ކާނިވާ ސަރަހައްދުގައި ކަމަށެވެ.
ގާނޫނުގެ އެ މާއްދާ ބާތިލްކުރަން ހައި ކޯޓަށް ދުސްތޫރީ މައްސަލައެއް ހުށައަޅާފައިވާއިރު، އެ މައްސަލައާއި ގުޅޭގޮތުން ބޭއްވި އަޑުއެހުމުގައި ދައުލަތުން ބުނީ އެއްވެ އުޅުން ހަނިކުރި އިސްލާހު އުވާލުމުގެ ބިލް މަޖިލީހުން ބަލައިގަނެ، މިހާރު ދިރާސާ ކުރަމުންދާތީ ގާނޫނުގެ އެ ބައި ބާތިލްކުރުމުގެ މައްސަލަ މިވަގުތު ކޯޓުން ބެލުމުގެ ބޭނުމެއް ނެތް ކަމަށެވެ.
Advertisement
This content is created and paid for by advertisers and does not involve Voice Journalists