ދިވެހިރާއްޖޭގެ ބްރޯޑްކާސްޓިން ދާއިރާއަށް ދިގު މުއްދަތަކަށް ޚިދުމަތްކޮށްދެއްވާފައިވާ ކުރީގެ އިންފޮމޭޝަން މިނިސްޓަރު މ. ސަމަރުބްލޫ، އިބްރާހީމް މަނިކު (ސަމަރޭ) އަވަހާރަވެއްޖެ އެވެ.
މިނިސްޓަރ އޮފް އިންފޯމޭޝަން އެންޑް ބްރޯޑްކާސްޓިންގ ގެ މަޤާމްވެސް އަދާކުރެއްވި އިބްރާހީމް މަނިކު އަވަހާރަވީ އާލާސްކަންފުޅަކަށް އިންޑިއާގެ ބެންގަލޫރުގެ ހޮސްޕިޓަލެއްގައި ފަރުވާ ހޯއްދަވަމުން ގެންދަވަނިކޮށް މިއަދުގެ ހެންދުނުގެ ވަގުތެއްގައިކަމަށް މަޢުލޫމާތު ލިބެއެވެ.
އިބްރާހިމް މަނިކު ވަނީ 1974 އިން ފެށިގެން 2006 އާ ހަމައަށް ދިވެހިރާއްޖޭގެ ބްރޯޑްކާސްޓިން ދާއިރާގައި ވަރަށް ގިނަ އަގުނުކުރެވޭ ފަދަ ޚިދުމަތްތަކެއް ކޮށްދެއްވާފަ އެވެ.
އެމަނިކުފާނަކީ ރާއްޖޭގެ ބްރޯޑްކާސްޓިން ދާއިރާގައި އެންމެ ގިނަ ދުވަހު މަސައްކަތް ކުރެއްވި އަދި ދައުލަތުގެ މީޑިއާ އެންމެ ގިނަ ދުވަހު ހިންގެވި ކުޅަދާނަ ހުށައެޅުންތެރިއެއްވެސް މެއެވެ. އެގޮތުން ޒަމާންވީ ރޭޑިއޯ މޯލްޑިވްސް ޒަމާނުއްސުރެން އޭނާ ހުށައަޅައިދެމުން ގެންދިޔަ "ބާއްޖެވެރި ހެދުނެއް،" ޕްރޮގްރާމަކީ ރާއްޖޭގެ ގިނަބައެއްގެ މެދުގައި ވަރަށް މަގުބޫލް ވެގެންދިޔަ ޕްރޮގްރާމެކެވެ.
އިބްރާހިމް މަނިކުގެ ޚިދުމަތްތަކުގެ އަގުވަޒަންކުރައްވައި، މޯލްޑިވްސް ބްރޯޑްކާސްޓިން ކޮމިޝަނުން ފުރަތަމަ ފަހަރަށް ބޭއްވި "މޯލްޑިވްސް ބްރޯޑްކާސްޓް އެވޯޑް 2022" ޙަފްލާގައި އެ މަނިކުފާނަށް ވަނީ ބްރޯޑްކާސްޓިން ލައިފްޓައިމް އެޗީވްމަންޓް އެވޯޑް އަރުވާފަ އެވެ.
Advertisement
This content is created and paid for by advertisers and does not involve Voice Journalists
