ރައީސުލްޖުމްހުރިއްޔާ އިބްރާހީމް މުހައްމަދު ޞާލިހު ވެރިކަމަށް ވަޑައިގެންނެވީ، އެމަނިކުފާނުގެ ސަރުކާރެއްގައި ދަރަންޏެއް ނުނަގާނެ ކަމަށް ވިދާޅުވެ ކަމަށާ އެހެންނަމަވެސް މި ސަރުކަާރުން އެއްގޮތަކަށް ވެސް ނުނަގާތޯ އަހައި، ޕީޕީއެމްގެ ނާއިބު ރައީސް އަދި ތ.ގުރައިދޫ ދާއިރާގެ މެންބަރު ޣައްސާން މައުމޫންގެ ފާޑުކިޔުންތައް ސަރުކާރަށް އަމާޒުކުރައްވައިފިއެވެ. 

އަދުގެ ސަރުކާރުން ވެރިކަމަށް އަންނަންވެގެން ވެފައިވާ ވައުދުތަކަށް ފާޑުވިދާޅުވެ ޣައްސާން މިއަދު ކުރެއްވި ޓުވީޓެއްގައި ވަނީ، އެއީ 2018އިގައި އަދުގެ ސަރުކާރުންވީ ދޮގު ވައުދުތައް ރައްޔިތުންނަށް ހާމަވެފައިވާ ކަމަށް ވިދާޅުވެފައެވެ. އަދި ރައްޔިތުންނަށް މިހާރު ވެރިކަން ކުރާ އެމްޑީޕީގެ މަކަރުވެރިކަން ފެންނަމުންދާ ކަމަށް ވިދާޅުވެ އޭރު އެ ޕާޓީން ވީ ވައުދު ތަކާއި މިހާރު ކަން ކުރަމުން އަންނަ ގޮތަށް ޣައްސާން ވަނީ ފާޑުވިދާޅުވެފައެވެ. 

"ވައްކަމާއި ދެކޮޅޭ ބުނި. އެންމެ ކޮރަޕްޓް ސަރުކާރު. އިންސާފުގެ ދަތުރޭ ބުނި. އެކި މީހުންނަށް އެކި ގޮތް. ޖޭއެސްސީީ ބޭނުންކޮށް ފަނޑިޔާރުންނަށް ނުފޫޒު ފޯރުވަން އުޅުން އާއްމު ވެފައި. ދަރަންޏެއް ނުނަގާނަމޭ ބުނި. އެއްގޮތަކަށް ވެސް ނުނަގާތަ؟" ޣައްސާން ވިދާޅުވިއެވެ. 

2018 ވަނަ އަހަރު އެމްޑީޕީން ވެރިކަމަށް އައީ ތާހިރު، ދެފުށް ފެންނަ، ޚަރަދު ކުޑަ، ޝަރުޢީ ދާއިރާއަށް ނުފޫޒު ނުފޯރު ވާނޭ ވެރިކަމެއް ކުރާނެ ކަމަށް ވައުދުވެގެންނެވެ. އަދި އޭރު ވެރިކަމަށް އަންނަން ވެގެން އެމްޑީޕީން ވަނީ ކުރީގެ ރައީސް ޔާމީން އަބްދުލްގައްޔޫމް ގެ ވެރިކަމުގައި ޗައިނާއިން ލޯނު ނަގައި ރާއްޖޭގެ ދަރަނި އިންތިހާއަށް އިތުރު ކޮށްފައިވާ ކަމަށް ބުނެ އެފަދައިން އެމްޑީޕީ ސަރުކާރެއްގައި ކަން ނުކުރާނެ ކަމަށް ބުނަމުންނެވެ. 

އެހެންނަމަވެސް އަދުގެ ސަރުކާރުން ކަން ކުރަނީ އެ ވައުދުތަކާއި ދިމާ އިދިކޮޅަށް ކަމަށް އެމްޑީީޕީގެ ބައެއް މެންބަރުން ވެސް އަންނަނީ ބުނަމުންނެވެ. އެގޮތުން، އިންޑިއާ އިން އެތައް ލޯނެއް ނަގައި ރާއްޖޭގެ ދަރަނި ދުވަހަކުވެސް ނުދާހާ މައްޗަށް މިހާރު ގޮސްފައިވާއިރު, ކޮވިޑް ތެރޭގައި ވެންޓިލޭޓަރުން ކުރި ވައްކަމާއި، އެނޫންވެސް ސަރުކާރުގެ ތެރެއިން ހިންގާ ކޮރަޕްޝަންގެ މައްސަލަތަކުގެ އިތުރުން، ޖުޑިޝަރީއަށް ބާރު ފޯރުވުން ވެސް އިންތިހާ އަށް މިހާރު އިތުރުވެފައިވާ ކަމަށް އިދިކޮޅުންނާއި، އެމްޑީީޕީގެ ބައެއް މެންބަރުން ވެސް އަންނަނީ ބުނަމުންނެވެ.