އެއްޖިންސުން ގުޅުން ހިންގުން ޕްރޮމޯޓް ނުކުރެވިގެން ޤަތަރަށް ފާޑުކިޔައި ގޮންޖެހި ޖަރުމަނުން، ޤަތަރުން ލިކުއިޑް ގޭސް ގަތުމަށް އެ ގައުމާއި އެކު އެގްރީމެންޓް އެއްގައި ސޮއިކޮށްފިއެވެ.
15 އަހަރު ދުވަހަށް ބަހާލައިގެން ދެ މިލިއަން ޓަނުގެ ލިކުއިޑް ގޭސް ގަޔުމަށް ޤަތަރާއިއެކު ޖަރުމަނުން މި ވި އެއްބަސްވުމުގެ ދަށުން، ލިކުއިޑް ގޭސް ފޯރުކޮށްދެން ފެށުމަށް ހަމަޖެހިފައިވަނީ 2026 ވަނަ އަހަރުން ފެށިގެންނެވެ. މިއީ ޖަރުމަނު ވިލާތަކީ ކާބަން ނިޔުޓްރަލް ގައުމަކަށް ހެދުމަށް ކުރަމުންދާ މަސައްކަތްތަކުގެ ދަށުން ވެވުނު އެއްބަސްވުމެއް ކަމަށް އެ ގައުމުން ބުނެއެވެ.
ޖަރުމަނުން ޤަތަރާއި އެކު މިފަދަ އެއްބަސްވުމެއްގައި ސޮއި ކޮށްފައިވާއިރު، ޤަތަރުގައި މިހާރު ކުރިއަށްދާ ވޯލްޑްކަޕާއި ގުޅިގެން އެގައުމަށް އެންމެ ބޮޑަށް ފާޑުކިޔައި ގޮންޖެހު ގައުމަކީ ވެސް ޖަރުމަނުކަން ފާހަގަކޮށްލަންޖެހެއެވެ. އެގޮތުން، ޤަތަރުގައި އެއްޖިންސުން ގުޅުން ހިންގުން ޕްރޮމޯޓް ކުރުން މަނާ ކުރުމާއި، އަދި އެގައުމުން ވޯލްޑްކަޕް އަށް ތައްޔާރު ވުމުގެ ގޮތުން ސްޓޭޑިއަމް ތަށް ތައްޔާރު ކުރި އިރު، އެކަމުގައި އުޅުނު މަސައްކަތްތެރިންނާއި މެދު ލާއިންސާނީ ޢަމަލުތައް ހިންގާފައިވާ ކަމަށް ބުނެ ޤަތަރަަށް އެންމެ ބޮޑަށް ފާޑުކިޔާފައިވާ ގައުމު ތަކުގެ ތެރޭގައި ޖަރުމަނު ހިމެނެއެވެ.
އަދި އޭގެ އިތުރުން، ވޯލްޑްކަޕް މެޗުތަކުގައި އެއްޖިންސުން ގުޅުން ހިންގުން ޕްރޮމޯޓް ކުރާ 'ވަންލަވް' އާމްބޭންޑް އެޅުން މަނާކުރުމާއި ގުޅިގެން އެކަމާއި ނުރުހުން ފާޅުކޮށް ޖަރުމަނުގެ ފުޓުބޯޅަ ޓީމުން ފުރަތަމަ މެޗު ފެށުމުގެ ކުރިން ފޮޓޯއަށް ހުއްޓުނުއިރު އަންގަމަތީގައި އަތްއެޅި އިރު، އެގައުމުގެ ކުޅިވަރުގެ ކަންކަމާއި ގުޅޭ މިނިސްޓަރު ވަނީ ޖަރުމަނު ކުޅުނު މެޗު ބަލަންދިޔައިރު ވަންލަވް އާމްބޭންޑް އަޅާފައެވެ.
އެފަދަ ގިނަ ފާޑުކިޔުންތަކާއި އެކު ގަތަރުން ހަދާފައިވާ ގަވާއިދުތަކަށް ގޮންޖެހުމަށްފަހުވެސް، އަމިއްލަ ބޭނުމެއް ޖެހުމުން ގަތަރާއި އެކު އެއްބަސްވުމަކަށް ދިޔުމުން ގިނަ ބަޔަކު އަންނަނީ ޖަރުމަނަށް ފާޑުކިޔަމުންނެވެ.
Advertisement
This content is created and paid for by advertisers and does not involve Voice Journalists
