މާލޭގައި ހުރި އެންމެ ބޮޑު މިސްކިތްކަމަށްވާ ކިންގް ސަލްމާން މިސްކިތުގެ އޭސީތައް މަރާމާތުކުރުމުގެ މަސައްކަތް ކުރިއަށްދާ ކަމަށް އިސްލާމިކް މިނިސްޓްރީން ބުނެފިއެވެ. 

އޮކްޓޯބަރ މަހުގެ ފަހުކޮޅުން ފެށިގެން ސަލްމާން މިސްކިތުގެ ނަމާދުކުރަން ބޭނުންކުރާ ދެ ފަންގިފިލާއަށް ވެސް ފިނިކުރަން ބޭނުންކުރާ ހަތަރު ޔުނިޓުގެ ތެރެއިން ތިން އޭސީ ޔުނިޓު ހަލާކުވެފައި ވާއިރު އަދިވެސް އެ މައްސަލަ ހައްލު ކުރެވޭގޮތް ވަނީ ނުވެފައެވެ.

އޭސީތައް ހަލާކުވެފައި ހުރުމުން ނަމާދުކުރާ އެއްވެސް ބަޔަކަށް ފިނި ނުވާއިރު ވެންޓިލޭޝަން ރަނގަޅު ނަމަވެސް އެ ތަނުގައި މެންދުރު ވަގުތު ހުންނަނީ ހޫނުގަދަވެ އުދާސްވެފައެވެ. އޭގެ ސަބަބުން އެ މިސްކިތަށް ނަމާދުކޮށް ކުރަންދާ ގިނަ އަދަދެއްގެ މީހުން އަންނަނީ ޝަކުވާކޮށް ނުރުހުން ފާޅުކުރަމުންނެވެ. 

Advertisement

އެކަމާއި ގުޅިގެން މިއަދު އިސްލާމިކް މިނިސްޓްރީން ބުނީ، ސަލްމާން މިސްކިތުގެ އޭސީ މާރާމާތު ކުރުމުގެ މަސައްކަތް ބަޔަކާ ހަވާލު ކުރެވިގެން ކުރިއަށް ދާކަމަށެވެ.

އަދި އެ މަސައްކަތަށް ރާއްޖެއިން ބޭރުން ގެންނަންޖެހޭ ތަކެތި މިމަހު 15ގެ ކުރިން ލިބޭނެ ކަމަށާއި މުޅި މަސައްކަތް އެއްކޮށް މިމަހު 25ގެ ކުރިން ނިންމާލެވޭނެ ކަމަށް ކޮންޓްރެކްޓަރ މައުލޫމާތުދޭ ކަމަށްވެސް މިނިސްޓްރީން ވަނީ ބުނެފައެވެ.