އެމްޓީސީސީން ރާއްޖޭގެ ހަތަރު ރަށެއްގައި މިހާރު ހަދަމުންދާ ގަތަރު އެއާރޕޯރޓް، ރައީސުލްޖުމްހުރިއްޔާ އިބްރާހީމް މުހައްމަދު ޞާލިހުގެ މި ދައުރު ނިމުމުގެ ކުރިން ނިންމާލެވޭނެ ކަމަށް އެ ކުންފުނީގެ ސީއީއޯ އާދަމް އާޒިމް ވިދާޅުވެއްޖެއެވެ.

ރ. އަލިފުށީ އެއަރޕޯޓާއި، މ. މުލީ އެއަރޕޯޓުގެ އިތުރުން ގދ. ފަރެސްމާތޮޑާ އެއަރޕޯޓާއި ފ.މަގޫދޫ އެއަރޕޯޓްގެ މަސައްކަތާއި ގުޅިގެން ވީޓީވީގެ 'ފަސްމަންޒަރު' ޕްރޮގްރާމުގައި ވާހަކަ ދައްކަވަމުން އާޒިމް ވަނީ އެމްޓީސީސީން މިހާރު ހަދަމުންދާ އެއާޕޯޓްތަކުގެ މަސައްކަތް ކުރިއަށްދާ ގޮތުގެ އަދާހަމައެއް ދެއްވާފައެވެ. 

އެގޮތުން މ. މުލީ އެއަރޕޯޓުގެ ޓަރމިނަލަށް ބޭނުންވާ ބުޑުތައް ޖެހުމުގެ މަސައްކަތް މިހާރު ކުރިއަށްދާއިރު ފަޔަރ ބިލްޑިންގެ މަސައްކަތްވެސް ކުރިއަށްދާ ކަމަށާއި ރ.އަލިފުށީ އެއަރޕޯޓުގެ މަސައްކަތަށް ބޭނުންވާ ސާމާނު އެރަށަށް ގެންގޮސް ސައިޓް މޮބިލައިޒްކޮށްފައިވާ ކަމަށް އާޒިމް ވިދާޅުވިއެވެ. 

Advertisement

އަދި މީގެ އިތުރުން، އާޒިމް ވިދާޅުވީ، ފަރެސްމާތޮޑާ އެއަރޕޯޓްގެ މަސައްކަތަށް ބޭނުންވާ ބައެއް ސާމާނު ލިބުމުގެ ދަތިކަން ހުރި ނަމަވެސް، އެ އެއާޕޯޓް ގެ އަމަލީ ގިނަ މަސައްކަތްތަކެއް މިއަހަރުގެ ތެރޭގައި އެއްކޮށް ނިންމާލެވޭނެ ކަމަށެވެ.

"ބައެއް އިކުއިޕްމަންޓްތައް ގެނައުމުގަ ދަތިތަކެއް އެބަހުރި. ހުރިހާ އިކުއިޕްމަންޓްތަކެއް އައިސްގެން އެތަން ހުޅުވޭނީ. އަންނަ އަހަރުގެ ތެރޭގައި ފަރެސްމާތޮޑާ އެއަރޕޯޓް ހުޅުވިގެންދާނެ. ދެން ހުރި އެއަރޕޯޓްތަކަކީ ބިން ހިއްކައިގެން ހަދަމުންދާ ތަންތަން. އެހެންކަމުން ބިން ހިއްކުމާއި ބައެއް އިމާރާތްތައް އެޅުމުގެ މަސައްކަތްތައް މިހާރު ކުރިއަށްދަނީ." އާދަމް އާޒިމް ވިދާޅުވިއެވެ. 

ސާމާނުތައް ގެނައުމަށް ހުރި ދަތި ތަކުގެ އިތުރުން، އެއާޕޯޓް ގެ މަސައްކަތް ކުރިއަށް ގެންދިޔުމަށް އިގްތިސާދީގޮތުންވެސް ގޮންޖެހުންތަކެއް ހުރިކަން ފާހަގަކުރައްވައި އާޒިމް ވަނީ އަންނަ އަހަރުގެ އޮގަސްޓް މަހުގެ ކުރިން 4 އެއަރޕޯޓްގެ މަސައްކަތް ނިންމޭނެ ކަމުގެ އުންމީދު އެބައޮތް ކަމަށް ވިދާޅުވެފައެވެ.