ގައުމީ އެއާލައިން މޯލްޑިވިއަން އިން އެކްސެސް ބެގޭޖަށް ނަގާ ފީ ބޮޑުކޮށްފި އެވެ.

މޯލްޑިވިއަން އިން މިއަދު ކުރި އިއުލާނެއްގައި ބުނީ ސަރުކާރުން ޓީޖީއެސްޓީ ބޮޑު ކުރުމަށް ނިންމުމާއި ގުޅިގެން މި ޑިސެމްބަރު މަހުގެ 7 ވަނަ ދުވަހުން ފެށިގެން އިތުރުވާ ކޮންމެ ކިލޯއަކަށް 3.11 ޑޮލަރު ނެގުމަށް ނިންމާފައިވާ ކަމަށެވެ.

އެގޮތުން މާވަރުލު އެއާޕޯޓާއި، ކޫއްޑޫ އެއާޕޯޓް އަދި ކާޑެއްދޫ އެއާޕޯޓަށް މޯލްޑިވިއަން އިން ކުރާ ދަތުރުތަކުގައި މިއަދަދަށް ފައިސާ ނަގާނެ ކަމަށް މޯލްޑިވިއަން އިން ވަނީ ބުނެފައެވެ.

އަންނަ ޖެނުއަރީމަހުގެ 1 ވަނަ ދުވަހުން ފެށިގެން މުދަލާއި ޚިދުމަތުގެ އަގުން ނަގާ ޓެކްސް ބޮޑު ކުރުމަށް މަޖިލީހުން ފާސްކޮށްފައިވާއިރު ރައީސް އިބްރާހިމް މުހައްމަދު ޞާލިހު ވަނީ އެ ބިލު ތަސްދީގު ކުރައްވާފައެވެ. އެއާއިއެކު އާއްމު ޚިދުމަތްތަކުން ނަގަމުންއައި ޖީއެސްޓީ 6 އިންސައިން 8 އިންސައްތައަށް އިތުރުވެގެންދާނެއެވެ. 

މީގެ އިތުރުން، ޓޫރިޒަމާބެހޭ މިނިސްޓްރީން ހުއްދަ ލިބިގެން ހިންގާ ޓޫރިސްޓް ރިޒޯޓުތަކާއި، އިންޓަގްރޭޓަޑް ޓޫރިސްޓް ރިޒޯޓުތަކާއި، ރިޒޯޓް ހޮޓާތަކާއި، ހޮޓާތަކާއި، ޓޫރިސްޓް ގެސްޓްހައުސްތަކާއި، ޕިކްނިކް އައިލެންޑްތަކާއި، ޕްރައިވެޓް އައިލެންޑްތަކާއި، ޓޫރިސްޓް އުޅަނދުތަކާއި، ޔޮޓް ބަނދަރުތަކާއި، އެނޫންވެސް އެފަދަ ތަންތަނުން ވިއްކާ މުދަލާއި ޚިދުމަތުފެ އަގުން މީގެ ކުރިން ނަގަމުން އައި 12 އިންސަތައިގެ ޓެކްސްގެ އަދަދު 16 އިންސައްތަ އަށް ބަދަލުވެގެންދާނެއެވެ.