މިހާރު މިއޮތް ވެރިކަމަކީ ދެވަނަ ފަހަރަށް ތަޙައްމަލް ކުރެވޭނެ ވެރިކަމެއްނޫން ކަމަށް ޕީީޕީއެމްގެ ނައިބު ރައީސް އަދި މާލެސިޓީ ކައުންސިލްގެ މޭޔަރު ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރޭ އިދިކޮޅު ޕީޕީއެމުން ބޭއްވި ޖަގަހަ ޖަލްސާގައި ވާހަކަފުޅު ދައްކަވަމުން، މުޢިއްޒު ވިދާޅުވީ ޤައުމުގެ ޙާލަތު މިއަދު މިއޮތްގޮތުން ކޮންމެ ކަމަކަށް ރިޢާޔަތް ކުރިނަމަވެސް އެއީ ވަރަށް ސީރިއަސް ޙާލަތުގައި ހުރި ކަންކަން ކަމަށެވެ.

“ޤައުމުގެ މިނިވަންކަމާއި މެދު ވާހަކަ ދައްކަންވިޔަސް ކަންކަންއޮތީ އެހާ ބޮއްސުންލާފަ. ދީނަށް ހަޖޫ ޖެހުން، ދީނަށް ކުރާ ދުއްތުރާތަކާ ނުރައްކާތަކަށް ބެލިނަމަވެސް ކަންކަންއޮތީ ވަރަށް ނުރައްކާތެރި ޙާލަތެއްގަ. ޤައުމުގެ އިޤްތިޞާދުވެސް އޮތީ އަނދަވަޅަކަށް ވެއްޓިފަ” މުޢިއްޒު ވިދާޅުވިއެވެ.

Advertisement

އެހެންކަމުން މިހާރު މިއޮތް ވެރިކަމަކީ ދެވަނަ ފަހަރަށް ތަޙައްމަލް ކުރެވޭނެ ވެރިކަމެއްނޫންކަމަށާއި، ސިޔާސީ ޕާޓިއަކަށް ނިސްބަތްނުވާ މީހާވެސް މިކަމާއި ދޭތެރޭ ފުންކޮށް ވިސްނަންޖެހޭކަމުގައި މުޢިއްޒު ވަނީ ވިދާޅުވެފައެވެ.

"މީ ދެވަނަ ފަހަރަށް ތަހަންމަލް ކުރެވޭނެ ފަދަ ވެރިކަމެއް ނޫން. ދީނާ ގައުމަށް ވިސްނާނަމަ، ގައުމު ސަލާމަތް ކުރަން ބޭނުންވާނަމަ އެބަޖެހޭ ރައީސް ޔާމީނަށް މިއަންނަ އަހަރު އިންތިހާބުގައި ގައުމު ހަވާލުކުރަން." މުޢިއްޒު ވިދާޅުވިއެވެ.