ރައީސް އިބްރާހިމް މުޙައްމަދު ސޯލިހުގެ ސަރުކާރުން އަޅާ ބްރިޖެކޭ އެއްފަދައިން މިސަރުކާރުގެ ތަރައްޤީވެސް އޮތީ އޮޔާ ގޮސްފައި ކަމަށް ޕީޕީއެމްގެ ނައިބު ރައީސް އަދި ކުރީގެ ހައުސިންގ މިނިސްޓަރ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރޭ ޕީޕީއެމްގެ ޖަގަހަ ޖަލްސާގައި ވާހަކަފުޅު ދައްކަވަމުން ޑރ. މުޢިއްޒު ވަނީ މި ސަރުކާރުން ކުރިއަށް ގެންދަވާ ބްރިޖް މަޝްރޫޢުއަށް ވަރަށްބޮޑަށް ފާޑުވިދާޅުވެފައެވެ.
އެގޮތުން މުޢިއްޒު ވިދާޅުވީ ބްރިޖް މަޝްރޫޢުއަށް ޖަހާ ތަނބާއި، ޕްލެޓްފޯމް ވެސް ހަރުނުލާ އޮޔާ ދާ ގޮތްށް ސަރުކާރުގެ ތަރައްޤީވެސް އޮތީ އޮޔާ ގޮސްފައިވާ ކަމަށެވެ.
“މިސަރުކާރުގެ ބްރިޖް މަޝްރޫޢުއަށް ސަރުކާރުން އެއްވެސް ސަމާލުކަމެއް ނުދެއްވާ. ހައުސިންގް މިނިސްޓްރީއިން ދޭ ސަމާލުކަމެއް އޮތްކަމަކަށް ނުފެނޭ. ޖަހާ ތަނބެއް ޕްލެޓްފޯމެއް ހަރެއްނުލާ ދަނީ އޮޔާ. ތަރައްޤީވެސް އޮތީ އޮޔާ ގޮއްސަ. ފަސް އަހަރުގެ ތަރައްޤީ މިވަނީ ދިވެހި ރައްޔިތުންނަށް ބީވެގެން ގޮއްސަ” މުއިއްޒު ވިދާޅުވިއެވެ.
ނިމިދިޔަ ސަރުކާރުގެ ހައުސިންގް މިނިސްޓަރުގެ ހައިސިއްޔަތުން ސިނަމާލެ ބްރިޖްގެ މަސައްކަތް ކުރެއްވިގޮތް ވަރަށް ކައިރިން ފެނިވަޑައިގެންނެވިކަމަށާއި، އެވަޢުދު ރައީސް ޔާމީން ވެވަޑައިގެންނެވީ އަމިއްލަފުޅަށް އެކަން ކުރައްވާނެގޮތް ޕްލޭން ކުރައްވައިގެން އެކަން ކުރައްވާނެގޮތް އެނގިވަޑައިގެން ކަމަށް މުޢިއްޒު ވިދާޅުވިއެވެ.
“ރައީސް ޔާމީންގެ ރިޔާސީ ކެމްޕޭނުގައިވެސް ވިދާޅުވި ފުރަތަމަ ދައުރު ނިމޭނީ ބްރިޖް އަޅުއްވާފައޭ. އެވަޢުދުވެވަޑައިގެންނެވީ އަމިއްލަފުޅަށް އެކަން ކުރައްވާނެގޮތް ޕްލޭން ކުރައްވައިގެން އެކަން ކުރައްވާނެގޮތް އެނގިވަޑައިގެން. އެކަން އެއޮތީ ފެންނަން” މުއިއްޒު ވިދާޅުވިއެވެ.
އަދި ނިމިދިޔަ ސަރުކާރުން ބްރިޖް މަޝްރޫޢު ކާމިޔާބު ކަމާއިއެކު ގެންދެވުނީ، އެކަމަށްޓަކާ ރައީސް އޮފީހުގަ ޚާއްޞަ މަސައްކަތަކެއް ފައްޓަވާ ޗައިނާ ސަރުކާރާއި ރައީސް ޔާމީންގެ ސަރުކާރާއިއެކު ބްރިޖްގެ މަސައްކަތުގެ ސޮއި ކުރެވުނު ހިސާބުން އެކަމަށްޓަކާ މުޅި ސަރުކާރުގެ ހުރިހާ މުއައްސަސާތަކެއް ރުކުރުވާލައްވައިގެން ކަމަށެވެ. އަދި ސިނަމާލެ ބްރިޖްމަޝްރޫޢު އެހާ ކާމިޔާބުވުމުގެ އަސްލަކީ ރައީސް ޔާމީން ރޭވުންތެެރިކަމާއިއެކު އެކަން ކުރެއްވުމުގެ ނަތީޖާ ކަމަށް ޑރ. މުޢިއްޒު ވިދާޅުވިއެވެ.
ކުރީ ސަރުކާރުގެ މި ދުވަސްވަރާއި ހަމަޔަށް އައިއިރު ސިނަމާލެ ބްރިޖްގެ 70 އިންސައްތަ މަސައްކަތް އޮތީ ނިމިފައި ކަމަށާއި ، އެހެން ނަމަވެސް މިސަރުކާރަށް މިހާދުވަސް ވީއިރު ބްރިޖްގެ 1 އިންސައްތަ މަސައްކަތް ނިމުނުހެންވެސް ހީނުވާ ކަމުގަައި ޑރ. މުޢިއްޒުގެ ވާހަކަަފުޅުގައި ފާހަގަ ކުރެއްވިއެވެ.
Advertisement
This content is created and paid for by advertisers and does not involve Voice Journalists
