މި ވެރިކަމުގެ އެންމެ ޚާއްސަ ސިފައަކީ ބުޚުތާނު ދޮގުހެދުން ކަމަށް ކުރީގެ ނައިބުރައީސް ޑރ މުހައްމަދު ޖަމީލު އަހުމަދު ވިދާޅުވެއްޖެއެވެ. 

ޑރ ޖަމީލު މިފަދައިން ވިދާޅުވެފައިވަނީ މި ސަރުކާރުން މަސްވެރިންނަށް ވީ ވައުދުތައް ނުފުއްދާކަން ފާހަގަކުރައްވާ، ސަރުކާރަށް ގިނަ ފާޑުކިޔުންތައް އަމާޒުކުރައްވާ ކުރެއްވި ޓްވީޓެއްގައެވެ. 

ޑރ ޖަމީލުގެ އެ ޓްވީޓުގައި ވިދާޅުވީ ބުޚުތާނު ދޮގު ހެދުމަކީ މި ސަރުކާރުގެ އެންމެ ޚާއްސަ ސިފަކަމަށެވެ. މި ސަރުކާރު އައިފަހުން މަސްވެރިން "އަވަދި" ކޮށްފިކަމަށް ޑރ ޖަމީލު ވިދާޅުވިއެވެ. އަދި ސަރުކާރުން މަސްވެރިންގެ ގާތުގައި ދައްކާ ވާހަކަތަށް ބީރު ކަންފަތެއް ދިނުމަށްވެސް ޑރ ޖަމީލު ވަނީ ގޮވާލައްވާފައެވެ. 

Advertisement

ޑރ ޖަމީލުގެ ޓްވީތުގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށްވެސް ގިނަ ފާޑުކިޔުންތަކެއް އަމާޒުކުރެއްވިއެވެ. އެގޮތުން ޑރ ޖަމީލު ވިދާޅުވީ ރައީސް ސޯލިހަށް އެއްވެސް ކަމެއްގައި ރަނގަޅު ނަތީޖާ ނުނެރެވޭކަމަށެވެ. 

މި ސަރުކާރަކީ މަސްވެރިންނަށް ވަރަށް ބޮޑެތި ވައުދުތަކެއް ވެގެން ވެރިކަމަށް އައި ސަރުކާރެކެވެ. އެހެން ނަމަވެސް މަސްވެރިން ބާނާ މަސްކޮޅު ކިރުމުގަޔާއި، ކިރާ މަހަށް ފައިސާ ލިބުން ލަސްވާ މައްސަލައިގައި މަސްވެރިންގެ ބޮޑެތި ކަންބޮޑުވުންތަކެއް ވަނީ އެތައް ފަހަރެއްގެ މަތިން ހިއްސާކޮށްފައެވެ. 

މިއަހަރުގެ މަސްވެރިންގެ ދުވަސް ފާހަގަކުރުމަށް ރައީސް ސޯލިހު ފަރެސްމާތޮޑާއަށް ވަޑައިގަތުމުން، އެ ސަރަހައްދުގެ މަސްވެރިން ވަނީ މަސްވެރިންގެ ހުރި ކަންބޮޑުވުންތަކާއެކު މުޒާހަރާވެސް ކޮށްފައެވެ. 

މަސްވެރިންނަށް ސަރުކާރުން އިހުމާލުވެފައި ވާ ކަމަށާއި، މަސްވެރިންނަށް ވީ ވައުދުތައް ފުއްދުމުގައި ސަރުކާރު ނުކުޅެދިފައިވާކަން ފާހަގަކުރައްވާ މަސްވެރިންގެ ގިނަ ބަޔަކު ނިކުމެ އަޑުއުފުލާފައިވާކަން ފާހަގަކޮށްލެވެއެވެ.