ސަރުކާރު ހިންގާ މައި ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ އިސް ވެރިންނަކީ އަމިއްލަ ޕާޓީގެ އާންމު މެމްބަރުންނަށްވެސް ކަންކަން އޮޅުވާލާ ބައެއްކަމަށާއި، ދެން އެމްޑީީގެ ލީޑަރުންނަށް ރައްޔިތުން ފުރުސަތު ނުދިނުމަށް ޕީޕީއެމްގެ ނައިބުރައީސް އަދި މަޖިލީހުގެ ގުރައިދޫ ދާއިރާގެ މެމްބަރު ޣައްސާން މައުމޫނު ގޮވާލައްވައިފި އެވެ. 

ޣައްސާނު މިފަދައިން ވިދާޅުވެފައިވަނީ ޕީޕީއެމް އޮފީހުގައި ބޭއްވި ޖަލްސާއެއްގައި ވާހަކަދައްކަވަމުން ނެވެ.

އެގޮތުން ޣައްސާނު ވަނީ މި ސަރުކާރުން ރައްޔިތުންނަށް ވީ ވައުދުތައް ފުއްދާދިނުމުގައި ނުކުޅެދިފައިވާކަމުގެ ގިނަ މިސާލުތައް ދައްކަވާފައެވެ. 

Advertisement

ޣައްސާނުގެ ވާހަކައިގައި ވަނީ ރައީސް އިބްރާހިމް ސޯލިހު ވެރިކަމަށް އައުމަށް ވީ ވައުދުތަކާއި، ވެރިކަމަށް އައުމަށްފަހު ކަންކަން ކުރައްވަމުން ދާ ގޮތާއި ދިމާނުވާކަން ފާހަގަކުރައްވާ ބޮޑެތި ފާޑުކިޔުންތަކެއް އަމާޒު ކުރައްވާފައެވެ. 

އޭގެ ތެރެއިންވެސް ސަރުކާރުގެ ސިޔާސީ މަގާމުތައް އިތުރު ކުރަމުންދާ ދިއުމާއި، ސްޓިކާ ޖަހައިގެން ދައުލަތަށް އާމްދަނީ ހޯދަމުންދާ ދިއުމަށް ޣައްސާނުގެ ފާޑުކިޔުން އަމާޒުކުރެއްވިއެވެ. 

އެއާއެކު އޭނާ ވިދާޅުވީ، އެމްޑީޕީގެ ވެރިކަމުގައި މިއީ އާ ކަންތަކެއް ނޫންކަމަށެވެ. އަދި މި ވެރިކަމުގައި ކަންކަން ހިނގަމުންދާ ގޮތާއި މެދު ހައިރާންވެވަޑައި ނުގަންނަވާ ކަމަށެވެ. 

އެމްޑީޕީ ކޮންމެ ފަހަރަކުވެސް ވެރިކަމަށް އަންނަނީ އެމީހުންނަށް ނުފުއްދޭނެ ވައުދުތައް ވެގެން ކަމަށާއި، ވެރިކަމަށް އައުމަށްފަހު މަސައްކަތް ކުރަނީ އެމީހުންގެ އަމިއްލަ އެޖެންޑާތަކެއް ހާސިލް ކުރުމަށްކަމަށް ޣައްސާނު ވިދާޅުވިއެވެ. 

ޣައްސާނުގެ ވާހަކައިގައި ވަނީ އެމްޑީޕީއާއި އެޕާޓީގެ އިސްވެރިން ދައްކަވާ ވާހަކަތަށް ރައްޔިތުން އިތުރަށް ނުހެއްލުމަށް ގޮވާލައްވާފައެވެ. ޕާޓީގެ ދެ ރައީސުންގެ ދެމެދުގައި ނުތަނަވަސްކަމެއް އޮތްކަމަށް ދެއްކުމަށް މަސައްކަތް ކުރި ނަމަވެސް އެ ދެ ބޭފުޅުންނަކީވެސް ހަމަ އެކައްޗެއްކަމަށް ޣައްސާނުގެ ވާހަކައިގައި ވަނީ ސިފަ ކުރައްވާފައެވެ. 

އެމްޑީޕީގެ ރައީސް މުހައްމަދު ނަޝީދު އަދި އެމްޑީޕީގެ އެންމެ އިސް ލީޑަރު އިބްރާހިމް މުހައްމަދު ސޯލިހު

އެކަންކަން ފާހަގަކުރައްވާ ޣައްސާނު ވިދާޅުވީ، ދިވެހިރާއްޖޭގައި މިނިވަންކަމާއި އިސްތިގުލާލު ހިމާޔަތް ކުރެވޭނެ ވެރިކަމެއް ގާއިމް ކުރެވެން ޖެހޭކަމަށެވެ. އަދި މި ގައުމުގައި ތިބި އިންޑިއާ ސިފައިންވެސް އަނބުރާ ދާން ޖެހޭ ކަމަށާއި، ދިވެހިންގެ ވެރިކަމެއް މި ގައުމުގައި އުފެދިގެން ނޫނީ ހަމަޖެހުމެއް ނެތްކަމަށް ޣައްސާނު ވަނީ ވިދާޅުވެފައެވެ.