ދިވެހިރާއްޖޭގައި އިންސާނީ ހައްގުތަކާއި ގުޅުންހުރި ގިނަ މައްސަލަތަކެއް ފެންމަތިވަމުން ދިޔަ ނަމަވެސް ހިއުމަން ރައިޓްސް ކޮމިޝަން ރިއެކްޓް ނުކުރައްވާކަަމަށް ޕީޕީއެމްގެ ތަރުޖަމާނު ހީނާ ވަލީދު ވިދާޅުވެއްޖެއެވެ. 

ޕީޕީއެމް އޮފީހުގައި އޮތް ޖަލްސާއެއްގައި ވާހަކަދައްކަވަމުން ހީނާ ވިދާޅުވީ ދިވެހިރާއްޖޭގެ ގާނޫނު އަސާސީއިން ރައްޔިތުންގެ ވަރަށް ގިނަ އަސާސީ ހައްގުތަކެއް ކަށަވަރު ކޮށްދީފައިވާ ކަމަށެވެ. 

އެ ހައްގުތައް ރައްކާތެރިކުރުމުގެ ޒިންމާ އެކި މުއައްސަސާތަކާއި މަތިކޮށްފައި ވީ ނަމަވެސް، ރައްޔިތުންގެ ހައްގުތައް ކަށަވަރުކުރުމުގެ ޒިންމާ އެ މުއައްސަސާތަކުން އެކަށިގެންވާ ގޮތެއްގައި ނަގަމުން ނުދާކަމަށް ހީނާ ވިދާޅުވިއެވެ. 

Advertisement

އެގޮތުން އިންސާނީ ހައްގުތަކާއި ކަރާމާތަށް އަރައިގަނެފައިވާ އެތައް މައްސަލަތަކެއް މި ރާއްޖޭގައިވެސް ފެންމަތިވަމުން އަންނައިރު، އިންސާނީ ހައްގުތައް ރައްކާތެރިކުރުމުގެ ޒިންމާ މަތިވެފައިވާ ހިއުމަން ރައިޓްސް ކޮމިޝަނުން އެއްވެސް ފިޔަވަޅެއް އަޅަމުން ނުދާކަމަށް ހީނާ ވިދާޅުވިއެވެ. 

ހީނާގެ ވާހަކައިގައި ވަނީ އިދިކޮޅުގެ މުޒާހަރާތަކުގައި ހައްޔަރުކުރާ ފަރާތްތަކަށް އެކި ވަރުގެ އަނިޔާތައް ލިބުނު ނަމަވެސް އެއިން ފަރަާތަކަށް އިންސާފު ނުލިބޭކަން ފާހަގަކުރައްވާފައެވެ. 

އިދިކޮޅުގެ މުޒާހަރާތައް ރޫޅާލުމަށް ފުލުހުން ހާލަތާއި ނުބައްދަލު ބާރުގެ ބޭނުންކޮށް، މުޒާހަރާގެ ބައިވެރިންނަށް އަނިޔާ ކުރާ އެތައް މައްސަލައެއް ހިއުމަން ރައިޓްސް ކޮމިޝަނަށް މިހާރުވެސް ހުށައަޅާފައި ވާއިރު، އެއިން އެއްވެސް މައްސަލައެއް ބަލާ، އަނިޔާ ލިބުނު ފަރާތްތަކަށް އިންސާފު ހޯދާ ދެވިފައި ނުވާކަމަށް ހީނާ ވިދާޅުވިއެވެ.